آئی ایم ایف کی جانب سے جاری نئی رپورٹ میں کہا گیا ہے کہ مضبوط حکومتی پالیسی اقدامات کے تسلسل نے پاکستان کی معاشی بحالی کو سہارا دیا، سرمایہ کاروں کے اعتماد میں اضافہ کیا اور معیشت کو بیرونی جھٹکوں کے مقابلے میں زیادہ مضبوط بنایا ہے۔
پاکستانی معیشت سے متعلق آئی ایم ایف کی اہم پیشگوئی
رپورٹ کے مطابق مالی سال 2026 کی پہلی ششماہی میں پاکستان کی جی ڈی پی گروتھ میں بہتری دیکھی گئی جبکہ مہنگائی کی شرح بھی قابو میں رہی۔ اس دوران کرنٹ اکاؤنٹ متوازن رہا اور زرمبادلہ کے ذخائر توقعات سے بہتر انداز میں بڑھے۔
آئی ایم ایف نے کہا کہ معاشی اصلاحات اور مالیاتی نظم و ضبط نے پاکستان کی معیشت کو استحکام دینے میں اہم کردار ادا کیا ہے۔
مشرقِ وسطیٰ کی صورتحال پر تشویش
رپورٹ میں خبردار کیا گیا کہ مشرقِ وسطیٰ میں جاری کشیدگی اور جنگ کے اثرات پاکستان کی معیشت پر دباؤ ڈال سکتے ہیں۔ خدشہ ظاہر کیا گیا ہے کہ عالمی حالات کے باعث مہنگائی میں دوبارہ اضافہ اور معاشی نمو متاثر ہو سکتی ہے، تاہم مجموعی اثرات محدود رہنے کی توقع ہے۔
پاکستانی معیشت کیلئے مثبت اشارے
ماہرین کے مطابق آئی ایم ایف کی حالیہ رپورٹ پاکستان کے لیے مثبت اشارہ سمجھی جا رہی ہے کیونکہ اس میں معاشی استحکام، بہتر زرمبادلہ ذخائر اور کنٹرول شدہ مہنگائی کو اہم کامیابی قرار دیا گیا ہے۔
حکومتی حلقوں کا کہنا ہے کہ معاشی اصلاحات، برآمدات میں اضافہ اور سرمایہ کاری کے فروغ سے آنے والے مہینوں میں معیشت مزید بہتر ہونے کی امید ہے۔
