امریکی سینٹرل کمانڈ نے جنگ بندی کے باوجود جنوبی ایران میں فضائی کارروائیوں کی تصدیق کی ہے اور کہا ہے کہ یہ حملے امریکی فوجیوں کو ممکنہ خطرات سے محفوظ رکھنے کے لیے کیے گئے۔
سینٹرل کمانڈ کے ترجمان، امریکی بحریہ کے کیپٹن ٹِم ہاکنز کے مطابق، امریکی فورسز نے ان مقامات کو نشانہ بنایا جن کے بارے میں خیال کیا جاتا تھا کہ وہاں ایسی کشتیاں موجود ہیں جو بارودی سرنگیں بچھانے کے لیے استعمال ہو سکتی تھیں، اور ایرانی فورسز کے میزائل لانچنگ پلیٹ فارم بھی وہاں موجود تھے۔
انہوں نے کہا کہ سینٹرل کمانڈ اپنی فورسز اور اہلکاروں کے تحفظ کو یقینی بنانے کے لیے مسلسل کام کر رہی ہے اور جنگ بندی کے دوران بھی تحمل کا مظاہرہ کیا جا رہا ہے۔
ایک برطانوی خبر رساں ادارے کے مطابق، جنوبی ایران کے ساحلی علاقوں، خصوصاً بندر عباس کے قریب اور آبنائے ہرمز کے اطراف دھماکوں کی آوازیں سنی گئیں، تاہم ایرانی حکام نے فوری طور پر کسی بڑے جانی یا مالی نقصان کی تصدیق نہیں کی۔
یاد رہے کہ امریکہ اور ایران کے درمیان جنگ بندی 7 اپریل سے جاری ہے۔ گزشتہ چند ہفتوں کے دوران محدود نوعیت کے حملوں کی رپورٹس بھی سامنے آتی رہی ہیں، تاہم اب تک کسی بھی فریق نے جنگ بندی کی واضح خلاف ورزی کا اعلان نہیں کیا۔
دوسری جانب تہران اور واشنگٹن کے درمیان مفاہمت کی ایک یادداشت پر پیش رفت جاری ہے، تاہم یہ معاہدہ ابھی مکمل طور پر حتمی شکل اختیار نہیں کر سکا۔
