سعودی وزارت خارجہ نے خطے میں بڑھتی ہوئی کشیدگی کم کرنے کی اپیل کرتے ہوئے پاکستان کی ثالثی کوششوں کی حمایت کا اظہار کیا

سعودی عرب نے خطے میں بڑھتی ہوئی کشیدگی پر گہری تشویش کا اظہار کرتے ہوئے تمام فریقین پر زور دیا ہے کہ وہ صبر و تحمل کا مظاہرہ کریں اور حالات کو مزید خراب ہونے سے بچائیں۔ وزارت خارجہ کی جانب سے سماجی رابطے کی ویب سائٹ ایکس پر جاری بیان میں کہا گیا کہ موجودہ صورتحال نہ صرف خطے بلکہ عالمی امن و استحکام کے لیے بھی خطرہ بن سکتی ہے، لہٰذا فوری طور پر تناؤ کم کرنے کی ضرورت ہے۔ سعودی عرب نے پاکستان کی سفارتی کوششوں اور ثالثی کردار کو سراہتے ہوئے اس کی مکمل حمایت کا اعلان کیا تاکہ کشیدگی کا پرامن اور سیاسی حل تلاش کیا جا سکے اور خطہ مزید بحران سے محفوظ رہے۔ بیان میں آبنائے ہرمز میں جہاز رانی کی بحالی کو بھی انتہائی اہم قرار دیا گیا، کیونکہ اس راستے کی بندش عالمی تجارت اور توانائی کی ترسیل پر منفی اثر ڈال سکتی ہے۔ دوسری جانب سعودی ولی عہد محمد بن سلمان نے محمد بن زید النہیان سے ٹیلیفون پر رابطہ کیا، جس میں متحدہ عرب امارات پر ہونے والے حملوں کی شدید مذمت کی گئی، جبکہ سعودی قیادت نے یو اے ای کی سلامتی اور استحکام کے لیے ہر ممکن تعاون جاری رکھنے کے عزم کا اعادہ بھی کیا۔