عیدالاضحیٰ پر گیس فراہمی کا شیڈول جاری، سوئی سدرن نے اوقات کا اعلان کر دیا
کراچی: عیدالاضحیٰ کے موقع پر شہریوں کی سہولت کے لیے سوئی سدرن گیس کمپنی نے گھریلو صارفین کے لیے گیس فراہمی کا خصوصی شیڈول جاری کر دیا ہے۔
ذرائع کے مطابق عید سے قبل کل رات 3 بجے سے صبح 10 بجے تک گیس سپلائی بحال رکھنے کا فیصلہ کیا گیا ہے، جبکہ دن کے باقی اوقات میں معمول کے مطابق لوڈ مینجمنٹ شیڈول برقرار رہے گا۔
سوئی سدرن حکام کے مطابق عید کے پہلے اور دوسرے روز صبح 7:30 بجے سے رات 12 بجے تک گھریلو صارفین کو گیس فراہم کی جائے گی تاکہ شہری قربانی کے گوشت کی تیاری اور دیگر ضروریات آسانی سے پوری کر سکیں۔
عید کے تیسرے روز بھی صارفین کو ریلیف دیتے ہوئے صبح 7:30 بجے سے رات 10 بجے تک گیس سپلائی جاری رکھنے کا اعلان کیا گیا ہے۔
ذرائع کا کہنا ہے کہ عید کے دوران گیس پریشر کو برقرار رکھنے اور صارفین کو بہتر سہولت فراہم کرنے کے لیے خصوصی انتظامات کیے گئے ہیں۔
دوسری جانب شہریوں نے امید ظاہر کی ہے کہ اعلان کردہ شیڈول کے مطابق گیس کی فراہمی یقینی بنائی جائے گی تاکہ کھانا پکانے میں مشکلات کا سامنا نہ کرنا پڑے۔
