بنگلہ دیش کی حکومت نے عید الاضحیٰ 2026 کے موقع پر ملک بھر میں 7 روزہ سرکاری تعطیلات دینے کا اعلان کر دیا۔ یہ فیصلہ وزیرِ اعظم طارق رحمان کی زیرِ قیادت کابینہ کے اجلاس میں کیا گیا۔
کابینہ ذرائع کے مطابق عید کی چھٹیاں 25 مئی سے شروع ہو کر 31 مئی 2026 تک جاری رہیں گی۔ طویل تعطیلات کے باعث حکومتی امور کو معمول کے مطابق چلانے کے لیے 23 مئی بروز ہفتہ کی ہفتہ وار چھٹی ختم کرنے کا فیصلہ بھی کیا گیا ہے۔
حکام کا کہنا ہے کہ سرکاری دفاتر 23 اور 24 مئی کو معمول کے مطابق کھلے رہیں گے، جبکہ 25 مئی سے عید کی تعطیلات کا باقاعدہ آغاز ہوگا۔
کابینہ اجلاس میں اس موقع پر "نیشنل پبلک ٹوائلٹ پالیسی 2026” کے مسودے کی بھی منظوری دی گئی۔ نئی پالیسی کے تحت عوامی مقامات پر صفائی کے معیار کو بہتر بنانے کے ساتھ خواتین اور بچوں کے لیے الگ اور جدید واش رومز کی سہولت فراہم کی جائے گی۔
حکومتی حکام کے مطابق طویل تعطیلات کا مقصد عید کے دوران سفر کرنے والے لاکھوں افراد کو سہولت فراہم کرنا، ٹریفک کے دباؤ میں کمی لانا اور شہریوں کو پرسکون انداز میں مذہبی تہوار منانے کا موقع دینا ہے۔
