سعودی عرب نے مسجد اقصیٰ میں اسرائیلی قابض فوج کی جانب سے مبینہ اشتعال انگیز کارروائیوں اور اسرائیلی پرچم لہرانے کے واقعے پر سخت ردعمل دیتے ہوئے عالمی برادری سے فوری مداخلت کا مطالبہ کر دیا ہے۔
سعودی وزارت خارجہ کا سخت بیان
سعودی وزارت خارجہ نے اپنے بیان میں کہا کہ مسجد اقصیٰ میں اسرائیلی اہلکاروں کی کارروائیاں عالمی قوانین اور مقدس مقامات کے احترام کی کھلی خلاف ورزی ہیں۔ بیان میں القدس اور مسجد اقصیٰ کی تاریخی و قانونی حیثیت کو مسلم دنیا کیلئے انتہائی اہم قرار دیا گیا۔
سعودی حکام نے واضح کیا کہ مقدس مقامات کی بے حرمتی اور مسلمانوں کے جذبات کو مجروح کرنے والی کسی بھی کارروائی کو قبول نہیں کیا جا سکتا۔
عالمی طاقتوں سے فوری ایکشن کا مطالبہ
سعودی عرب نے اقوامِ متحدہ اور عالمی طاقتوں پر زور دیا کہ وہ اسرائیل کو ایسے اقدامات سے روکنے کیلئے فوری اور مؤثر کردار ادا کریں تاکہ خطے میں مزید کشیدگی پیدا نہ ہو۔
بیان میں کہا گیا کہ مسلسل اشتعال انگیز کارروائیاں مشرق وسطیٰ کے امن اور استحکام کیلئے خطرہ بنتی جا رہی ہیں۔
مسجد اقصیٰ کی صورتحال پر تشویش
مسجد اقصیٰ اور یروشلم کی صورتحال پر مسلم ممالک میں تشویش پائی جاتی ہے جبکہ مختلف اسلامی ممالک کی جانب سے اسرائیلی اقدامات کی مذمت کا سلسلہ جاری ہے۔
