معرکۂ حق کی پہلی سالگرہ کے موقع پر پاک افواج خصوصاً پاک فضائیہ کی پیشہ ورانہ صلاحیتوں اور دفاعی کامیابیوں کو بھرپور خراجِ تحسین پیش کیا گیا ہے۔
پاک فوج کے شعبۂ تعلقات عامہ (آئی ایس پی آر) کے مطابق معرکۂ حق نے نہ صرف قومی اعتماد کو نئی توانائی بخشی بلکہ پاکستان کی دفاعی تیاریوں اور جدید فضائی حکمت عملی کو بھی دنیا کے سامنے نمایاں کیا۔
آئی ایس پی آر نے کہا کہ پاک فضائیہ جدید ٹیکنالوجی، ملٹی ڈومین آپریشنز اور پیشہ ورانہ مہارت کے ذریعے مستقبل کی ایک مؤثر فضائی قوت کے طور پر ابھر رہی ہے۔
بیان میں کہا گیا کہ پاک فضائیہ کی کامیابیوں نے قوم کے حوصلے، اعتماد اور حب الوطنی کے جذبے کو مزید مضبوط کیا ہے جبکہ پاکستان ہمیشہ امن، استحکام اور ذمہ دارانہ دفاعی حکمت عملی پر یقین رکھتا ہے۔
ترجمان کے مطابق پاک افواج خطے کی بدلتی جیوپولیٹیکل صورتحال پر مسلسل نظر رکھے ہوئے ہیں اور دشمن کی ہر ممکن جارحانہ تیاری سے مکمل طور پر آگاہ ہیں۔
آئی ایس پی آر نے کہا کہ پاک فوج جدید عسکری ٹیکنالوجی اور پیشہ ورانہ تربیت میں مسلسل سرمایہ کاری کر رہی ہے تاکہ مستقبل کے جنگی چیلنجز کا مؤثر انداز میں مقابلہ کیا جا سکے۔
بیان میں واضح کیا گیا کہ کسی بھی جارحیت کا جواب پہلے سے زیادہ طاقت، درستگی اور عزم کے ساتھ دیا جائے گا، جبکہ معرکۂ حق کے دوران دشمن پاکستان کی فیصلہ کن صلاحیتوں کا عملی مظاہرہ دیکھ چکا ہے۔
آئی ایس پی آر کے مطابق پاک فضائیہ نے ملکی فضائی حدود کے تاریخی دفاع میں کلیدی کردار ادا کیا اور اس کی بروقت کارروائیاں عسکری تاریخ کا اہم باب بن چکی ہیں۔
ترجمان نے مزید کہا کہ پاک فضائیہ اپنی جدید جنگی صلاحیتوں اور غیر متزلزل عزم کی بدولت دنیا بھر میں نمایاں مقام رکھتی ہے اور ہمیشہ قوم کے لیے فخر، طاقت اور اعتماد کی علامت رہے گی۔
