جنین کے گاؤں میں افسوسناک واقعہ
مغربی کنارے کے علاقے جنین کے ایک گاؤں میں ایک فلسطینی خاندان کو مبینہ طور پر یہودی آبادکاروں کی دھمکیوں کے بعد اپنے والد کی لاش قبر سے نکالنے پر مجبور ہونا پڑا۔
80 سالہ حسین عصاصہ کو اسلامی روایات کے مطابق مقامی قبرستان میں دفن کیا گیا تھا، تاہم تدفین کے کچھ ہی دیر بعد خاندان کو اطلاع ملی کہ چند آبادکار قبر کھود رہے ہیں۔
خاندان کا مؤقف
مرحوم کے بیٹے محمد عصاصہ کے مطابق جب وہ قبرستان پہنچے تو مسلح آبادکار قبر کھود رہے تھے اور لاش تک پہنچنے کی کوشش کر رہے تھے۔
خاندان کا کہنا ہے کہ آبادکاروں نے دھمکی دی کہ یا تو وہ خود لاش نکالیں یا پھر وہ یہ کام کریں گے۔ بعد ازاں اہلِ خانہ نے اپنے والد کی لاش قبر سے نکال کر دوسرے مقام پر دفن کی۔
اسرائیلی فوج اور آبادکاروں پر الزامات
اسرائیلی فوج کا کہنا ہے کہ اس نے صورتحال مزید خراب ہونے سے روکنے کیلئے مداخلت کی، جبکہ خاندان نے الزام لگایا کہ فوجی اہلکار واقعے کے دوران خاموش رہے۔
مقامی افراد کے مطابق حالیہ مہینوں میں علاقے میں کشیدگی اور آبادکاروں سے متعلق تشدد کے واقعات میں اضافہ دیکھنے میں آیا ہے۔
اقوام متحدہ کا ردعمل
اقوام متحدہ کے انسانی حقوق کے دفتر نے اس واقعے کی مذمت کرتے ہوئے اسے فلسطینیوں کے ساتھ غیر انسانی سلوک کی ایک سنگین مثال قرار دیا ہے۔
انسانی حقوق کی تنظیموں کے مطابق مغربی کنارے میں آبادکاروں اور فلسطینی آبادی کے درمیان تناؤ مسلسل بڑھ رہا ہے، جس سے مقامی لوگوں کی زندگی اور نقل و حرکت متاثر ہو رہی ہے۔
