نیو یارک کے میئر زہران ممدانی نے عیدالفطر کی نماز میں شرکت کی
نیو یارک کے میئر زہران ممدانی نے بروکلین کے پراسپیکٹ پارک میں عیدالفطر کی نماز میں شرکت کی اور مسلمان برادری کے افراد سے ملاقات بھی کی۔ اس موقع کی تصاویر اور ویڈیوز سوشل میڈیا پر بھی توجہ کا مرکز بنیں۔
عید کے اجتماع میں زہران ممدانی کے لباس نے بھی لوگوں کی توجہ حاصل کی۔ انہوں نے روایتی انداز کے قریب ایک منفرد کُرتا اور پینٹ پہن رکھی تھی، جس پر مختلف بین الاقوامی کھیلوں اور برانڈز سے متعلق لوگوز نمایاں تھے۔
تصاویر میں ان کے لباس پر ایمیریٹس ایئرلائن، ایڈیڈاس اور انگلش فٹ بال کلب آرسنل کے لوگوز دیکھے جا سکتے تھے، جبکہ بازو پر روانڈا سے متعلق تشہیری پیغام بھی درج تھا۔
سوشل میڈیا پر صارفین نے اس منفرد لباس پر مختلف تبصرے کیے۔ بعض صارفین نے اسے جدید فیشن اور کھیلوں کی ثقافت کا امتزاج قرار دیا جبکہ کچھ نے اسے نیو یارک کی متنوع شناخت کی نمائندگی کہا۔
عید کے موقع پر زہران ممدانی نے اپنے پیغام میں کہا کہ انہیں نیو یارک شہر کے پہلے مسلمان میئر ہونے پر فخر ہے اور وہ شہر کے تمام شہریوں کے لیے بہتر زندگی کے مواقع پیدا کرنے کی کوشش جاری رکھیں گے۔
زہران ممدانی 1991 میں یوگنڈا کے دارالحکومت کمپالا میں پیدا ہوئے۔ ان کے والد محمود ممدانی سیاسیات کے پروفیسر جبکہ والدہ میرا نائر معروف فلم ساز ہیں۔
وہ بچپن میں اپنے خاندان کے ساتھ نیو یارک منتقل ہوئے اور برونکس میں پرورش پائی۔ بعد ازاں انہوں نے سیاست میں قدم رکھا اور شہر کے پہلے مسلمان میئر بنے۔
