پاکستان میں MG4 EV Urban متعارف، ایک چارج پر 316 کلومیٹر رینج
پاکستان میں الیکٹرک گاڑیوں کی مارکیٹ میں ایک اور اہم اضافہ ہوگیا ہے جہاں MG Motors نے اپنی نئی MG4 EV Urban متعارف کرا دی ہے۔ جدید ڈیزائن، تیز چارجنگ اور اسمارٹ ٹیکنالوجی سے لیس یہ الیکٹرک ہیچ بیک شہری ڈرائیونگ کے لیے ایک مضبوط آپشن سمجھی جا رہی ہے۔
کمپنی کے مطابق گاڑی میں 43 کلوواٹ آور بیٹری اور فرنٹ وہیل ڈرائیو الیکٹرک موٹر دی گئی ہے، جو 110 کلوواٹ پاور اور 250 نیوٹن میٹر ٹارک فراہم کرتی ہے۔ WLTP معیار کے تحت یہ گاڑی ایک مکمل چارج پر تقریباً 316 کلومیٹر تک سفر کر سکتی ہے۔
MG4 EV Urban کی نمایاں خصوصیت اس کی ڈی سی فاسٹ چارجنگ سپورٹ ہے، جس کے ذریعے بیٹری کو صرف 28 منٹ میں 10 فیصد سے 80 فیصد تک چارج کیا جا سکتا ہے، جو طویل سفر کرنے والے صارفین کے لیے خاصی سہولت فراہم کرتی ہے۔
گاڑی کے اندر جدید ٹیکنالوجی کا بھی خاص خیال رکھا گیا ہے۔ اس میں 12.8 انچ انفوٹینمنٹ ٹچ اسکرین، وائرلیس ایپل کار پلے، اینڈرائیڈ آٹو، ہیٹڈ فرنٹ سیٹس اور وائرلیس فون چارجنگ جیسے فیچرز شامل ہیں۔
حفاظتی نظام میں ایڈاپٹو کروز کنٹرول، آٹونومس ایمرجنسی بریکنگ، بلائنڈ اسپاٹ ڈیٹیکشن، لین کیپ اسسٹ اور 540 ڈگری ایچ ڈی کیمرا سسٹم جیسی جدید سہولیات دی گئی ہیں، جو ڈرائیونگ کو مزید محفوظ اور آسان بناتی ہیں۔
یہ گاڑی لاہور میں ایک خصوصی تقریب کے دوران متعارف کرائی گئی جہاں ڈیلرز، میڈیا نمائندگان اور آٹو انڈسٹری سے وابستہ شخصیات نے شرکت کی۔ کمپنی نے MG4 EV Urban کی پاکستان میں ابتدائی قیمت 69 لاکھ 49 ہزار روپے مقرر کی ہے۔
