کانگو میں ایبولا کے پھیلاؤ کے بعد روایتی تدفین اور آخری دیدار پر پابندی
جمہوریہ کانگو کے صوبہ اِتوری میں ایبولا وائرس کے بڑھتے ہوئے پھیلاؤ کے پیشِ نظر حکام نے روایتی تدفین اور مردوں کے آخری دیدار پر مکمل پابندی عائد کر دی ہے۔ یہ فیصلہ ایک ایسے واقعے کے بعد سامنے آیا ہے جس میں لاش کے حصول پر پولیس اور مقامی افراد کے درمیان جھڑپیں ہوئیں۔
برطانوی خبر رساں ادارے رائٹرز کے مطابق قصبہ روامپارا میں ایک مقامی فٹبالر کی موت کے بعد اہلخانہ نے انتظامیہ کے اس مؤقف کو مسترد کر دیا کہ موت ایبولا کے باعث ہوئی ہے، اور لاش لینے کی کوشش کی، جس کے نتیجے میں کشیدگی پیدا ہوئی۔
طبی ماہرین کے مطابق ایبولا سے ہلاک ہونے والے شخص کی لاش میں وائرس انتہائی متعدی حالت میں موجود رہتا ہے، اور اسی مرحلے پر لاش کو چھونا یا غسل دینا انفیکشن کے پھیلاؤ کا سب سے بڑا ذریعہ بن سکتا ہے۔
انٹرنیشنل فیڈریشن آف ریڈ کراس کی ماہر لورا آرچر کے مطابق غیر محفوظ تدفین اس وائرس کے پھیلاؤ کی اہم وجوہات میں سے ایک ہے۔ اسی طرزِ عمل کو ماضی میں بھی متعدد وباؤں کے پھیلاؤ سے جوڑا گیا ہے۔
عالمی ادارۂ صحت نے ایبولا کی اس قسم کو صحتِ عامہ کے لیے سنگین ہنگامی خطرہ قرار دیا ہے۔ ادارے کے مطابق وائرس تیزی سے پھیل سکتا ہے اور اس کے باعث صورتحال مزید خراب ہونے کا خدشہ ہے۔
ایبولا ایک مہلک وائرس ہے جو بخار، جسمانی درد، قے اور شدید کمزوری کا باعث بنتا ہے اور بنیادی طور پر متاثرہ جسمانی رطوبتوں کے براہِ راست رابطے سے منتقل ہوتا ہے۔
اعداد و شمار کے مطابق خطے میں سینکڑوں مشتبہ کیسز اور درجنوں اموات رپورٹ ہو چکی ہیں، جبکہ پڑوسی ملک میں بھی چند کیسز کی تصدیق ہوئی ہے۔
حکام نے وائرس کے پھیلاؤ کو روکنے کے لیے تدفین کے تمام امور کو خصوصی طبی ٹیموں تک محدود کر دیا ہے، عوامی اجتماعات پر پابندیاں عائد کی گئی ہیں اور بعض مقامی سرگرمیوں کو بھی معطل کر دیا گیا ہے۔
ماہرین صحت کے مطابق اس وقت سب سے بڑا چیلنج صرف وائرس نہیں بلکہ اس کے بارے میں غلط معلومات بھی ہیں، جو عوام میں خوف اور غلط فیصلوں کو جنم دے رہی ہیں۔
بین الاقوامی ادارے صورتحال پر قابو پانے اور متاثرہ علاقوں میں طبی امداد بڑھانے کے لیے ہنگامی اقدامات کر رہے ہیں، جبکہ خطے میں احتیاطی پابندیاں بھی سخت کر دی گئی ہیں۔
