افغانستان: لغمان میں مہاجرین کا ٹرک المناک حادثے کا شکار، 18 افراد جاں بحق
افغانستان کے مشرقی صوبے لغمان میں واپس آنے والے افغان مہاجرین کو لے جانے والا ٹرک حادثے کا شکار ہو گیا، جس کے نتیجے میں 18 افراد جاں بحق اور 30 زخمی ہو گئے۔
صوبائی پولیس کے مطابق یہ افسوسناک حادثہ ضلع قرغائی کے علاقے سرخکان میں پیش آیا، جہاں ٹرک ڈرائیور کے قابو سے باہر ہو کر الٹ گیا۔
حکام کے مطابق جاں بحق ہونے والوں میں 10 بچے اور 5 خواتین بھی شامل ہیں۔ حادثے کے بعد تمام زخمیوں کو فوری طور پر قریبی اسپتالوں میں منتقل کیا گیا، جہاں متعدد افراد کی حالت تشویشناک بتائی جا رہی ہے۔
پولیس کا کہنا ہے کہ حادثے کی وجوہات جاننے کے لیے تحقیقات شروع کر دی گئی ہیں، تاہم ابتدائی طور پر اسے تیز رفتاری اور ممکنہ لاپرواہی کا نتیجہ قرار دیا جا رہا ہے۔
یہ واقعہ ایک بار پھر افغانستان میں سڑکوں کی خراب صورتحال اور ٹریفک حادثات کے بڑھتے ہوئے خدشات کو اجاگر کرتا ہے۔
