واشنگٹن / منامہ: امریکی فوج کی مرکزی کمان (سینٹکام) نے ایران کے ان دعوؤں کو مسترد کر دیا ہے جن میں بحرین میں موجود امریکی فوجی اڈوں اور پانچویں بحری بیڑے کے ہیڈکوارٹر کو نشانہ بنانے کا دعویٰ کیا گیا تھا۔
سینٹکام نے سوشل میڈیا پلیٹ فارم ایکس پر جاری بیان میں کہا کہ پاسدارانِ انقلاب کے دعوے بے بنیاد ہیں اور ایران کی جانب سے داغے گئے میزائل اور ڈرون اپنے اہداف تک پہنچنے میں ناکام رہے۔
بیان کے مطابق "امریکی افواج کے خلاف ایران کے تمام حملے ناکام رہے۔ امریکی فورسز مکمل طور پر چوکنا ہیں اور کسی بھی بلاجواز جارحیت کے خلاف اپنے دفاع کے لیے تیار ہیں۔"
یہ بیان ایسے وقت میں سامنے آیا ہے جب خلیج فارس میں کشیدگی مسلسل بڑھ رہی ہے اور ایران، امریکا اور اسرائیل کے درمیان بیانات اور عسکری سرگرمیوں میں اضافہ دیکھا جا رہا ہے۔
دوسری جانب ایرانی حکام کی جانب سے تاحال امریکی مؤقف پر کوئی نیا ردعمل سامنے نہیں آیا، جبکہ دونوں فریقین کے دعوؤں کی آزاد ذرائع سے مکمل تصدیق ممکن نہیں ہو سکی۔
