حزب اللہ نے دعویٰ کیا ہے کہ اس نے جنوبی لبنان میں اسرائیلی افواج کے خلاف متعدد کارروائیاں کرتے ہوئے مختلف فوجی ٹھکانوں اور پیش قدمی کرنے والے دستوں کو نشانہ بنایا ہے۔
تنظیم کے مطابق منگل تک جاری رہنے والے آپریشنز کے دوران 13 مختلف حملے کیے گئے، جن میں فوجی اجتماع، گاڑیوں کے قافلے اور کمانڈ مراکز کو ہدف بنایا گیا۔
بیان میں کہا گیا ہے کہ ان کارروائیوں میں راکٹوں، توپ خانے، گائیڈڈ میزائلوں اور ڈرونز کا استعمال کیا گیا، جس کے نتیجے میں مختلف علاقوں میں شدید جھڑپیں دیکھنے میں آئیں۔
حزب اللہ کے مطابق جنوبی لبنان کے متعدد مقامات پر اسرائیلی افواج کی پیش قدمی کو روکنے کے لیے مزاحمت کی گئی، جبکہ حداثا اور البلوع کے علاقوں میں فوجی گاڑیوں اور مرکاوا ٹینکوں کو بھی نشانہ بنانے کا دعویٰ کیا گیا۔
مزید کہا گیا ہے کہ تاریخی بیوفورٹ قلعے کے آس پاس اور بئیاضہ کے علاقے میں بھی حملے کیے گئے، جہاں کمانڈ مراکز اور بکتر بند یونٹس کو ہدف بنایا گیا، جس کے بعد اسرائیلی افواج کو پیچھے ہٹنے پر مجبور ہونا پڑا۔
