ایران کا دعویٰ: 24 تجارتی بحری جہاز آبنائے ہرمز سے بحفاظت گزرے، سکیورٹی نگرانی جاری

ایران کی پاسدارانِ انقلاب (IRGC) نے دعویٰ کیا ہے کہ گزشتہ 24 گھنٹوں کے دوران 24 تجارتی بحری جہاز اس کی بحری نگرانی اور سکیورٹی تعاون کے تحت آبنائے ہرمز سے بحفاظت گزرے ہیں۔

ایرانی خبر رساں ادارے ارنا کے مطابق پاسدارانِ انقلاب کی جانب سے جاری بیان میں کہا گیا ہے کہ ان بحری جہازوں میں تیل بردار ٹینکرز اور کنٹینر بردار جہاز شامل تھے، جنہوں نے ضروری اجازت نامے حاصل کرنے کے بعد اس اہم سمندری گزرگاہ کو عبور کیا۔

بیان میں مزید کہا گیا ہے کہ ان جہازوں کی آمد و رفت کے دوران ایرانی بحریہ نے مکمل سکیورٹی فراہم کی تاکہ کسی بھی ممکنہ خطرے سے بچاؤ یقینی بنایا جا سکے۔

پاسدارانِ انقلاب نے اپنے مؤقف میں یہ بھی کہا کہ وہ آبنائے ہرمز پر مسلسل نگرانی اور کنٹرول برقرار رکھے ہوئے ہیں اور کسی بھی قسم کی “جارحیت یا خطرے” کا “فیصلہ کن جواب” دینے کے لیے مکمل طور پر تیار ہیں۔

بیان کے مطابق، فروری کے آخر میں ایران کے خلاف امریکی اور اسرائیلی کارروائیوں کے بعد مارچ کے آغاز سے اس اہم آبی گزرگاہ پر سکیورٹی اقدامات مزید سخت کیے گئے ہیں، جسے تہران اپنے دفاعی اقدامات کا حصہ قرار دیتا ہے۔

آبنائے ہرمز دنیا کی اہم ترین سمندری گزرگاہوں میں شمار ہوتی ہے، جہاں سے عالمی تیل اور گیس کی تقریباً 20 فیصد ترسیل ہوتی ہے، اور اس خطے میں کسی بھی کشیدگی کے عالمی توانائی منڈیوں پر فوری اثرات مرتب ہوتے ہیں۔