تہران: ایران کے ایک سینئر فوجی عہدیدار نے خبردار کیا ہے کہ اگر ملک کے خلاف کسی بھی قسم کی نئی فوجی کارروائی یا جارحیت کی گئی تو اس کا جواب پہلے سے کہیں زیادہ سخت اور طاقتور انداز میں دیا جائے گا۔
ایرانی سرکاری میڈیا کے مطابق بحریہ کے نائب کمانڈر برائے رابطہ ریئر ایڈمرل حبیب اللہ سیاری نے کہا کہ دشمن کو یہ بات اچھی طرح سمجھ لینی چاہیے کہ ایران اپنی سرزمین، خودمختاری اور قومی سلامتی کے دفاع کے لیے مکمل طور پر تیار ہے۔
انہوں نے کہا کہ ایران کی مسلح افواج ہر قسم کے خطرات اور دشمنانہ اقدامات کا مقابلہ کرنے کی صلاحیت رکھتی ہیں اور کسی بھی حملے کا فوری اور مؤثر جواب دیا جائے گا۔
یہ بیان ایسے وقت میں سامنے آیا ہے جب خطے میں سیکیورٹی صورتحال، ایران اور مغربی ممالک کے درمیان کشیدگی، آبنائے ہرمز کی صورتحال اور جوہری مذاکرات عالمی توجہ کا مرکز بنے ہوئے ہیں۔
دفاعی ماہرین کے مطابق ایران کی جانب سے آنے والے ایسے بیانات نہ صرف داخلی سطح پر دفاعی عزم کا اظہار ہوتے ہیں بلکہ علاقائی اور بین الاقوامی طاقتوں کو سیاسی و عسکری پیغام بھی دیتے ہیں۔
