ایران کے اہم عسکری کمانڈ ہیڈکوارٹر خاتم الانبیاء نے آبنائے ہرمز میں بحری سرگرمیوں کے حوالے سے سخت انتباہ جاری کرتے ہوئے کہا ہے کہ کسی بھی قسم کی فوجی مداخلت یا جہاز رانی کے مقررہ نظام میں خلل ڈالنے کی کوشش کرنے والے بحری جہازوں کو ایرانی مسلح افواج نشانہ بنا سکتی ہیں۔
ہیڈکوارٹر کی جانب سے جاری بیان میں کہا گیا ہے کہ تمام تجارتی جہاز، آئل ٹینکرز اور دیگر بحری کشتیاں صرف مقررہ بحری راستوں پر سفر کریں اور اس سے قبل پاسدارانِ انقلاب کی بحریہ سے ضروری اجازت حاصل کریں۔
بیان میں خبردار کیا گیا کہ مقررہ ضوابط کی خلاف ورزی نہ صرف سمندری سلامتی کے لیے خطرہ بن سکتی ہے بلکہ ایسے اقدامات کے خلاف فوری کارروائی بھی کی جا سکتی ہے۔
ایران کا مؤقف ہے کہ امریکہ اور اسرائیل کے حالیہ حملوں کے بعد اس نے آبنائے ہرمز میں جہازوں کی نقل و حرکت پر براہِ راست نگرانی اور کنٹرول سنبھال لیا ہے تاکہ خطے میں سلامتی کو یقینی بنایا جا سکے۔
دوسری جانب بعض غیر مصدقہ رپورٹس میں دعویٰ کیا گیا ہے کہ چند بحری جہاز آبنائے ہرمز کے اس حصے سے گزرنے کی کوشش کر رہے تھے جو عمان کی سمندری حدود میں واقع ہے، تاہم ان اطلاعات کی آزاد ذرائع سے تصدیق نہیں ہو سکی۔
ادھر عمان نے بھی چند گھنٹے قبل اپنے سمندری علاقے میں بارودی سرنگ سے مشابہ ایک مشکوک شے دیکھے جانے کے بعد جہاز رانوں اور ملاحوں کے لیے احتیاطی انتباہ جاری کیا تھا۔
ماہرین کے مطابق آبنائے ہرمز عالمی توانائی کی سپلائی کے لیے انتہائی اہم گزرگاہ ہے، جہاں کسی بھی قسم کی کشیدگی یا بحری نقل و حرکت میں رکاوٹ عالمی تیل کی منڈیوں اور بین الاقوامی تجارت پر اثرات مرتب کر سکتی ہے۔
