حکومت نے عوام کو ریلیف دیتے ہوئے مٹی کے تیل کی قیمت میں نمایاں کمی کا اعلان کر دیا ہے۔ پٹرول اور ڈیزل کے بعد اب مٹی کے تیل کی قیمت میں 41 روپے 44 پیسے فی لٹر کمی کی گئی ہے۔
نظرِ ثانی کے بعد مٹی کے تیل کی نئی قیمت 272 روپے فی لٹر مقرر کی گئی ہے، جبکہ اس سے قبل اس کی قیمت 313 روپے 44 پیسے فی لٹر تھی۔
حکومتی اعلامیے کے مطابق حالیہ قیمتوں میں رد و بدل کے ساتھ پٹرولیم مصنوعات پر لیوی ٹیکس میں بھی تبدیلی کی گئی ہے۔ پٹرول پر لیوی میں 10 روپے 83 پیسے فی لٹر کمی کی گئی ہے، جبکہ ڈیزل پر لیوی میں 10 روپے 93 پیسے فی لٹر اضافہ کیا گیا ہے۔
حکام کے مطابق یہ اقدامات عالمی منڈی میں تیل کی قیمتوں اور مالیاتی ضروریات کو مدنظر رکھتے ہوئے کیے گئے ہیں۔
توانائی کے شعبے سے وابستہ ماہرین کا کہنا ہے کہ پٹرولیم مصنوعات کی قیمتوں میں اتار چڑھاؤ کا براہِ راست اثر مہنگائی اور ٹرانسپورٹ کے اخراجات پر پڑتا ہے، جس سے عام صارف متاثر ہوتا ہے۔
حکومت کے اس فیصلے کو بعض حلقوں کی جانب سے عوامی ریلیف قرار دیا جا رہا ہے، تاہم ڈیزل پر لیوی میں اضافہ مستقبل میں ٹرانسپورٹ لاگت پر اثر ڈال سکتا ہے۔
