امریکی ریاست میسوری میں طیارہ حادثہ، 11 اسکائی ڈائیورز اور پائلٹ سمیت 12 افراد ہلاک
واشنگٹن: امریکی ریاست میسوری میں کینساس سٹی کے قریب ایک چھوٹا طیارہ گر کر تباہ ہوگیا، جس کے نتیجے میں طیارے میں سوار تمام 12 افراد ہلاک ہوگئے۔
امریکی میڈیا رپورٹس کے مطابق حادثہ بٹلر میموریل ایئرپورٹ کے قریب پیش آیا، جو کینساس سٹی سے تقریباً 60 میل جنوب میں واقع ہے۔ حکام کا کہنا ہے کہ طیارہ اسکائی ڈائیونگ سرگرمی کے لیے مسافروں کو لے جا رہا تھا۔
ٹیک آف کے فوراً بعد حادثہ
میسوری اسٹیٹ ہائی وے پیٹرول کے مطابق طیارہ ٹیک آف کے کچھ ہی دیر بعد اچانک واپس مڑا، تاہم چند لمحوں بعد کنٹرول کھو بیٹھا اور زمین پر آ گرا۔
حکام نے بتایا کہ طیارہ ایئرپورٹ سے متصل ایک کھیت میں گر کر تباہ ہوا، جس کے بعد اس میں شدید آگ بھڑک اٹھی۔
تمام مسافر جان کی بازی ہار گئے
حادثے کے وقت طیارے میں 11 اسکائی ڈائیورز اور ایک پائلٹ سوار تھا۔ ریسکیو اہلکاروں کے پہنچنے تک تمام افراد ہلاک ہو چکے تھے۔
میسوری ہائی وے پیٹرول کے سارجنٹ جسٹن ایونگ کے مطابق اتوار کی صبح تقریباً 11 بج کر 30 منٹ پر ایمرجنسی سروسز کو حادثے اور آگ لگنے کی اطلاع موصول ہوئی تھی۔
انہوں نے بتایا کہ حفاظتی اقدامات کے تحت قریبی سڑک کو بند کرنے پر بھی غور کیا گیا جبکہ امدادی ٹیموں نے فوری طور پر علاقے کو گھیرے میں لے لیا۔
تحقیقات کا آغاز
نیشنل ٹرانسپورٹیشن سیفٹی بورڈ (این ٹی ایس بی) نے حادثے کی تحقیقات شروع کر دی ہیں۔
ادارے کے ترجمان کے مطابق حادثے کی وجوہات جاننے کے لیے شواہد اکٹھے کیے جا رہے ہیں اور ابتدائی تحقیقات مکمل ہونے کے بعد مزید تفصیلات جاری کی جائیں گی۔
حادثے کے بعد بٹلر پولیس ڈیپارٹمنٹ، بیٹس کاؤنٹی شیرف آفس اور دیگر امدادی اداروں نے جائے وقوعہ پر امدادی اور تحقیقی سرگرمیوں میں حصہ لیا۔
