لاہور میں پنجاب حکومت نے طلبہ اور بے روزگار نوجوانوں کے لیے ایک بڑے اقدام کے طور پر آئندہ مالی سال کے بجٹ میں 50 ہزار ای بائیکس اور 5 ہزار ای ٹیکسیاں بلاسود فراہم کرنے کی تجویز منظور کر لی ہے۔
اس منصوبے کا مقصد نوجوانوں کو سفری سہولت کے ساتھ ساتھ روزگار کے بہتر مواقع فراہم کرنا ہے۔
وزیر ٹرانسپورٹ پنجاب بلال اکبر خان کے مطابق حکومت کی جانب سے ایک خصوصی بلاسود اسکیم متعارف کرائی جا رہی ہے، جس کے تحت مستحق افراد کو آسان اقساط پر فنانسنگ کی سہولت دی جائے گی۔
انہوں نے کہا کہ ای ٹیکسی اسکیم نوجوانوں کے لیے معاشی خودمختاری کا ذریعہ بنے گی اور وہ اس کے ذریعے اپنا روزگار خود پیدا کر سکیں گے۔
حکام کے مطابق اس منصوبے کے تحت رجسٹریشن اور دیگر مراعات بھی فراہم کی جائیں گی تاکہ زیادہ سے زیادہ نوجوان اس اسکیم سے فائدہ اٹھا سکیں۔
پنجاب حکومت کا کہنا ہے کہ یہ اقدام نہ صرف روزگار کے نئے مواقع پیدا کرے گا بلکہ صوبے میں ماحول دوست اور جدید ٹرانسپورٹ نظام کے فروغ میں بھی اہم کردار ادا کرے گا۔
