ایپل کے پہلے فولڈ ایبل آئی فون سے متعلق اب تک متعدد لیکس اور افواہیں سامنے آ چکی ہیں، جبکہ تازہ رپورٹس میں اس ڈیوائس کے ڈمی یونٹس اور ممکنہ ڈیزائن کی تفصیلات بھی منظر عام پر آ گئی ہیں۔
ایک یوٹیوب ویڈیو میں مبینہ فولڈ ایبل آئی فون کے ڈمی یونٹس دکھائے گئے ہیں، جن سے اس کے ڈیزائن اور ساخت کے بارے میں اہم اشارے ملتے ہیں۔
ویڈیو کے مطابق ڈیوائس میں والیوم بٹنز اوپر کی جانب رکھے جانے کا امکان ہے جبکہ اسپیکرز کو مخالف کونوں میں پوزیشن کیے جانے کی توقع ہے۔
بیک کی جانب دو کیمرا لینز دیے جانے کا امکان ہے، جو ایپل کے روایتی آئی فون ڈیزائن سے ملتے جلتے ہوں گے۔
لیک ہونے والے ڈمی ماڈلز سے ظاہر ہوتا ہے کہ فون بند ہونے کی صورت میں چوکور شکل اختیار کرے گا، جبکہ کھلنے پر یہ کسی ٹیبلیٹ جیسا تجربہ فراہم کرے گا۔
رپورٹس کے مطابق اس کا ڈیزائن موجودہ فولڈ ایبل فونز سے مختلف ہوگا، جس میں چوڑائی زیادہ اور لمبائی نسبتاً کم رکھی جا سکتی ہے، جبکہ کھلنے پر یہ آئی پیڈ جیسا احساس دے گا۔
فولڈ ہونے کی حالت میں اس کے اندازے کے مطابق ڈائمینشنز 117.71 ملی میٹر لمبائی اور 84.27 ملی میٹر چوڑائی ہو سکتی ہیں۔
اسکرین کے حوالے سے لیکس میں بتایا گیا ہے کہ کھلنے پر یہ ڈیوائس 7.8 انچ ڈسپلے پیش کر سکتی ہے، جبکہ بند حالت میں 5.5 انچ اسکرین دستیاب ہوگی۔
اندرونی طور پر اس میں A20 پرو چپ اور تقریباً 5500 ایم اے ایچ بیٹری شامل کیے جانے کا امکان ظاہر کیا جا رہا ہے۔
کیمرا سیٹ اپ کے بارے میں کہا جا رہا ہے کہ یہ آئی فون ایئر سے متاثر ہوگا مگر مکمل بلیک کیمرہ ماڈیول کے ساتھ دو لینز، ایک مائیکروفون اور فلیش شامل ہو سکتے ہیں، تاکہ یہ ڈیوائس فولڈ اور اوپن دونوں حالتوں میں پریمیم آئی پیڈ پرو جیسا تاثر دے۔
