ایچ ای سی نے جامعات کو ایک سال کیلئے ایم فل اور پی ایچ ڈی داخلہ ٹیسٹ میں نرمی دے دی
اسلام آباد: ہائر ایجوکیشن کمیشن (ایچ ای سی) نے ملک بھر کی سرکاری اور نجی جامعات کو ایم فل، ایم ایس اور پی ایچ ڈی پروگراموں کے داخلہ ٹیسٹ سے متعلق نئی پالیسی پر عمل درآمد کے لیے ایک سال کی مہلت دے دی ہے۔
ایچ ای سی کے مطابق جامعات کی تیاری مکمل نہ ہونے کے باعث نئی ٹیسٹنگ پالیسی کو 2027 تک موخر کر دیا گیا ہے۔ اس فیصلے کے بعد 2026 کے دوران یونیورسٹیاں ایم فل، ایم ایس اور پی ایچ ڈی پروگراموں میں داخلوں کے لیے اپنے داخلی یا علیحدہ ٹیسٹ خود منعقد کر سکیں گی۔
ایچ ای سی کی نئی پالیسی کے تحت 2027 سے لیول 7 (ایم فل/ایم ایس یا مساوی) اور لیول 8 (پی ایچ ڈی یا مساوی) پروگراموں میں داخلے صرف ایجوکیشن ٹیسٹنگ کونسل (ای ٹی سی) کے تحت منعقد ہونے والے جی آر ای/ہیٹ جنرل اور متعلقہ سبجیکٹ ٹیسٹ کی بنیاد پر دیے جائیں گے۔
اعلامیے کے مطابق نئی پالیسی کا مقصد ملک بھر میں اعلیٰ تعلیم کے معیار کو یکساں بنانا اور داخلوں کے عمل میں شفافیت پیدا کرنا ہے، تاہم متعدد جامعات نے تیاری کے لیے مزید وقت مانگا تھا۔
تعلیمی ماہرین کا کہنا ہے کہ اس فیصلے سے طلبہ اور جامعات دونوں کو وقتی ریلیف ملے گا جبکہ یونیورسٹیوں کو نئے نظام کے مطابق اپنی انتظامی اور تعلیمی تیاری مکمل کرنے کا موقع بھی حاصل ہوگا۔
