ہائیر ایجوکیشن کمیشن (ایچ ای سی) نے طلبہ اور گریجویٹس کیلئے مکمل طور پر آن لائن اور پیپر لیس ڈگری اٹیسٹیشن سسٹم متعارف کرا دیا ہے۔
نیا ای-اٹیسٹیشن سسٹم 11 مئی 2026 سے نافذ العمل ہو چکا ہے، جس کے تحت اب ڈگری اور تعلیمی اسناد کی تصدیق کیلئے ایچ ای سی دفاتر جانے یا اصل دستاویزات جمع کرانے کی ضرورت نہیں رہے گی۔
ای-اٹیسٹیشن سسٹم کیسے کام کرے گا؟
درخواست دہندگان اب گھر بیٹھے کسی بھی وقت آن لائن پورٹل کے ذریعے اپنی ڈگری تصدیق کیلئے درخواست جمع کرا سکتے ہیں۔
ایچ ای سی کے مطابق یہ نظام محفوظ، تیز رفتار اور صارف دوست بنایا گیا ہے تاکہ طلبہ کو آسانی فراہم کی جا سکے۔
درخواستیں ایچ ای سی کے آن لائن پورٹل پر جمع کروائی جائیں گی جبکہ تصدیق کے بعد درخواست دہندگان کو ای-اٹیسٹیشن سرٹیفکیٹ جاری کیا جائے گا۔
پرانے درخواست دہندگان کیلئے اہم ہدایت
ایچ ای سی نے واضح کیا ہے کہ جن افراد نے پہلے ہی فیس جمع کرا دی ہے، ان کی درخواستوں پر پرانے طریقہ کار کے تحت 30 جون 2026 تک کارروائی جاری رہے گی۔
جبکہ وہ درخواست دہندگان جنہوں نے ابھی تک فیس جمع نہیں کرائی، انہیں نئے آن لائن سسٹم کے ذریعے اپلائی کرنے کی ہدایت کی گئی ہے۔
طلبہ کیلئے بڑی آسانی
ماہرین کے مطابق اس نئے آن لائن ڈگری ویریفکیشن سسٹم سے طلبہ کا وقت اور اخراجات دونوں کم ہوں گے جبکہ جعلسازی روکنے اور ڈیجیٹل تصدیق کے عمل کو مزید مؤثر بنانے میں بھی مدد ملے گی۔
