سام آلٹمین نے کہا ہے کہ مصنوعی ذہانت کے تیزی سے بڑھتے استعمال کے باوجود یہ ٹیکنالوجی انسانی ملازمتوں کو مکمل طور پر ختم نہیں کرے گی۔
اوپن اے آئی کے سربراہ نے آسٹریلیا کے شہر سڈنی میں ایک کانفرنس سے ورچوئل خطاب کرتے ہوئے کہا کہ ابتدا میں انہیں خدشہ تھا کہ مصنوعی ذہانت عالمی سطح پر بیروزگاری میں اضافہ کر سکتی ہے، خاص طور پر ابتدائی درجے کی ملازمتیں زیادہ متاثر ہو سکتی ہیں۔
انہوں نے بتایا کہ 2022 میں چیٹ جی پی ٹی کے متعارف ہونے کے بعد کمپنی کی کچھ پیشگوئیاں درست ثابت ہوئیں، تاہم معاشرتی اور معاشی اثرات کے بارے میں اندازے مکمل طور پر درست نہیں نکلے۔
سام آلٹمین کے مطابق مصنوعی ذہانت نے کام کے انداز کو ضرور تبدیل کیا ہے، لیکن یہ انسانوں کا مکمل متبادل نہیں بن سکی۔
انہوں نے کہا کہ وہ خود ای میلز اور پیغامات کے جواب کے لیے مصنوعی ذہانت استعمال کرتے ہیں، لیکن کئی مواقع پر ذاتی طور پر جواب دینا زیادہ بہتر سمجھتے ہیں کیونکہ انسانی رابطہ اب بھی اہم ہے۔
ان کا کہنا تھا کہ کئی ملازمتیں ایسی ہیں جن میں جذباتی سمجھ بوجھ اور براہِ راست انسانی تعامل ضروری ہوتا ہے، اور مصنوعی ذہانت ان کا مکمل متبادل نہیں بن سکتی۔
اگرچہ حالیہ عرصے میں ٹیکنالوجی کی صنعت میں مصنوعی ذہانت کے باعث کچھ اداروں نے ملازمین کی تعداد کم کی ہے، لیکن مستقبل میں انسان اور مصنوعی ذہانت کے ساتھ کام کرنے کا رجحان بڑھنے کی توقع ہے۔
