سانپ بغیر ٹانگوں کے اتنی تیزی سے کیسے حرکت کرتے ہیں؟ سائنسدانوں نے حیران کن راز بتا دیا

سانپوں کو زمین پر رینگتے، درختوں پر چڑھتے اور پانی میں تیرتے دیکھ کر اکثر یہ سوال پیدا ہوتا ہے کہ آخر بغیر ٹانگوں کے وہ اتنی مہارت سے حرکت کیسے کرتے ہیں۔ حیران کن بات یہ ہے کہ سانپ ہمیشہ سے بغیر ٹانگوں کے نہیں تھے بلکہ لاکھوں سال پہلے ان کے بھی پاؤں ہوا کرتے تھے۔

سائنسی تحقیق کے مطابق قدیم سانپوں کے فوسلز سے معلوم ہوا ہے کہ ان میں چھوٹی ٹانگیں موجود تھیں، جو وقت کے ساتھ ارتقائی عمل کے دوران ختم ہو گئیں۔ ماہرین کا کہنا ہے کہ تنگ بلوں، چٹانوں اور زیرِ زمین ماحول میں رہنے کے باعث لمبا اور بغیر ٹانگوں والا جسم زیادہ مفید ثابت ہوا، اسی لیے قدرتی انتخاب نے سانپوں کی موجودہ شکل کو فروغ دیا۔

سانپوں کے جسم میں 200 سے 400 تک ریڑھ کی ہڈیاں اور طاقتور پٹھے ہوتے ہیں، جو انہیں جسم کو مختلف انداز میں موڑنے اور زمین پر دباؤ ڈال کر آگے بڑھنے میں مدد دیتے ہیں۔ ان کے جسم کے نچلے حصے پر موجود خاص چھلکے زمین سے رگڑ پیدا کرتے ہیں، جس سے وہ بغیر ٹانگوں کے بھی آسانی سے حرکت کر لیتے ہیں۔

سائنسدانوں کے مطابق سانپ مختلف ماحول میں الگ انداز سے حرکت کرتے ہیں۔ کچھ لہروں جیسی “S” شکل میں رینگتے ہیں، کچھ صحراؤں میں سائیڈ واکنگ کرتے ہیں جبکہ پائیتھن جیسے بڑے سانپ پیٹ کے پٹھوں کی مدد سے آہستہ آہستہ آگے بڑھتے ہیں۔ یہی صلاحیت انہیں دنیا کی کامیاب ترین رینگنے والی مخلوقات میں شامل کرتی ہے۔

دلچسپ حقیقت: آج بھی بعض پائیتھن سانپوں کی دم کے قریب چھوٹے ابھار پائے جاتے ہیں، جنہیں ماہرین قدیم ٹانگوں کی باقیات قرار دیتے ہیں۔