پاکستان میں آئی فون استعمال کرنے والوں کے لیے ایک اہم پیش رفت سامنے آئی ہے، جہاں میڈیا رپورٹس کے مطابق ایپل نے فی الحال اپنے آئی فون ڈیوائسز پر 5G فیچر فعال نہ کرنے کا فیصلہ کیا ہے۔
وزارتِ آئی ٹی اور ٹیلی کام حکام کے مطابق ایپل نے پاکستانی حکام کو آگاہ کیا ہے کہ کمپنی 2027 میں پاکستان کی مارکیٹ کا دوبارہ جائزہ لینے کے بعد ہی آئی فون صارفین کے لیے 5G سپورٹ فراہم کرنے پر غور کرے گی۔
ٹیکنالوجی ماہرین کا کہنا ہے کہ پاکستان میں درآمدی اسمارٹ فونز، خصوصاً آئی فونز پر عائد بھاری ٹیکسوں کے باعث ایپل کی مارکیٹ محدود ہو چکی ہے، جس کی وجہ سے کمپنی نے 5G سروسز کے اجرا میں تاخیر کا فیصلہ کیا۔
دوسری جانب سام سنگ سمیت کئی اینڈرائیڈ اسمارٹ فونز پر 5G سہولت پہلے ہی دستیاب ہے اور صارفین مختلف شہروں میں آزمائشی سروسز سے فائدہ اٹھا رہے ہیں۔
واضح رہے کہ حکومت پاکستان نے رواں سال مارچ میں 507 ملین ڈالر مالیت کے 5G اسپیکٹرم کی نیلامی مکمل کی تھی، جس کے تحت مجموعی طور پر 480 میگا ہرٹز اسپیکٹرم فروخت کیا گیا۔ اس اقدام کا مقصد ملک میں تیز رفتار اور بہتر انٹرنیٹ سروسز فراہم کرنا ہے۔
ٹیلی کام حکام کے مطابق موبائل آپریٹرز نے 5G نیٹ ورک کے لیے درکار آلات کی خریداری شروع کر دی ہے جبکہ چند علاقوں میں آزمائشی بنیادوں پر سروسز بھی متعارف کرائی جا چکی ہیں۔ تاہم آئی فون صارفین کو اس ٹیکنالوجی سے مکمل فائدہ اٹھانے کے لیے مزید انتظار کرنا پڑ سکتا ہے۔
