گوگل نے خبردار کیا ہے کہ ہیکرز مصنوعی ذہانت (اے آئی) کے جدید ٹولز کو سائبر حملوں اور سیکیورٹی خامیوں کی تلاش کے لیے استعمال کرنے کی کوشش کر رہے ہیں، جس کے باعث عالمی سطح پر سائبر سیکیورٹی کے خطرات میں اضافہ دیکھا جا رہا ہے۔
گوگل کے Google تھریٹ انٹیلیجنس گروپ کے مطابق بعض سائبر مجرم جدید اے آئی ماڈلز کی مدد سے ایسے سافٹ ویئر نقائص تلاش کرنے کی کوشش کرتے ہیں جنہیں “زیرو ڈے” خامیاں کہا جاتا ہے۔ یہ خامیاں وہ سیکیورٹی مسائل ہوتے ہیں جن کے بارے میں سافٹ ویئر بنانے والی کمپنیوں کو پہلے سے علم نہیں ہوتا۔
رپورٹ میں یہ ضرور بتایا گیا کہ اے آئی ٹولز سائبر حملوں کے طریقہ کار کو تیز اور زیادہ مؤثر بنا سکتے ہیں، تاہم اس بات کے واضح شواہد موجود نہیں کہ مکمل طور پر اے آئی نے خود مختار انداز میں کوئی انتہائی خفیہ یا ناقابلِ شناخت ہیکنگ نظام تیار کیا ہو۔
گوگل کے ماہرین کے مطابق کمپنی نے ممکنہ خطرناک سرگرمیوں کی بروقت نشاندہی کرتے ہوئے حفاظتی اقدامات مزید سخت کر دیے ہیں تاکہ صارفین کے ڈیٹا اور آن لائن سسٹمز کو محفوظ رکھا جا سکے۔
دوسری جانب سائبر سیکیورٹی اداروں کی مختلف رپورٹس میں یہ بات سامنے آئی ہے کہ گزشتہ برس کے دوران اے آئی سے منسلک خودکار سائبر حملوں، فشنگ مہمات اور جعلی مواد کی تیاری میں نمایاں اضافہ ہوا ہے۔ ماہرین کا کہنا ہے کہ اے آئی ٹیکنالوجی جہاں سیکیورٹی بہتر بنانے میں مدد دے رہی ہے، وہیں اسے غلط مقاصد کے لیے استعمال کرنے کی کوششیں بھی بڑھ رہی ہیں۔
سائبر سیکیورٹی ماہرین نے صارفین کو مشورہ دیا ہے کہ وہ اپنے سسٹمز اور ایپلی کیشنز کو باقاعدگی سے اپ ڈیٹ رکھیں، مشکوک لنکس سے گریز کریں اور دو مرحلہ جاتی تصدیق (Two-Factor Authentication) جیسے حفاظتی اقدامات استعمال کریں۔
