ایل جی کی صارفین کو اہم وارننگ
اگر آپ گھر میں اسمارٹ ٹی وی استعمال کرتے ہیں تو مچھر مارنے والے الیکٹرک ریکٹ کا استعمال کرتے وقت احتیاط ضروری ہے، کیونکہ یہ آپ کے مہنگے ٹی وی کو شدید نقصان پہنچا سکتا ہے۔
ٹیکنالوجی کمپنی ایل جی نے خبردار کیا ہے کہ ایل ای ڈی اور او ایل ای ڈی اسمارٹ ٹی وی کے قریب ہائی وولٹیج مچھر مار ریکٹ یا بگ زیپر استعمال کرنا خطرناک ثابت ہو سکتا ہے۔
ٹی وی کیسے خراب ہوتا ہے؟
ماہرین کے مطابق جب الیکٹرک ریکٹ مچھر کو مارتا ہے تو اس سے پیدا ہونے والا ہائی وولٹیج اسپارک اور برقی مقناطیسی لہریں ٹی وی کے حساس الیکٹرانک حصوں کو متاثر کرتی ہیں۔
اس سے مدر بورڈ، ڈسپلے پینل، ٹی کان بورڈ اور دیگر اہم سرکٹس خراب ہو سکتے ہیں، جس کے نتیجے میں اسکرین کالا ہونا، تصویر جم جانا یا ٹی وی کا بار بار بند ہونا جیسے مسائل سامنے آ سکتے ہیں۔
مرمت کا خرچ بہت زیادہ
ماہرین کا کہنا ہے کہ جدید اسمارٹ ٹی وی کے پینل اور سرکٹس کی مرمت انتہائی مہنگی ہوتی ہے، اور بعض اوقات نیا ٹی وی خریدنا ہی واحد حل رہ جاتا ہے۔
ٹی وی کو محفوظ رکھنے کے طریقے
کمپنی نے مشورہ دیا ہے کہ اسمارٹ ٹی وی کو ایسی جگہ رکھا جائے جہاں ہوا کی بہتر آمدورفت ہو تاکہ زیادہ گرمی پیدا نہ ہو۔
اس کے علاوہ سرج پروٹیکٹر کا استعمال کریں، اسکرین صاف کرنے کیلئے صرف مائیکرو فائبر کپڑا استعمال کریں اور ٹی وی کے قریب ہیئر ڈرائر، انڈکشن چولہا یا بھاری اسپیکرز رکھنے سے گریز کریں۔
ماہرین کے مطابق مچھروں کو بھگانے کیلئے اسکرین کے قریب الیکٹرک ریکٹ چلانا جدید اسمارٹ ٹی وی کیلئے خطرناک ثابت ہو سکتا ہے۔
