یوٹیوب کا نیا AI فیچر: اب ویڈیو خود بتائے گی جواب کہاں ہے!
دنیا کی سب سے بڑی ویڈیو پلیٹ فارم یوٹیوب ایک ایسا نیا AI فیچر متعارف کرا رہا ہے جو صارفین کے ویڈیوز دیکھنے کا انداز مکمل طور پر بدل سکتا ہے۔ گوگل کے مطابق نئے “Ask YouTube” فیچر کے ذریعے اب صارفین صرف سوال پوچھیں گے اور یوٹیوب نہ صرف متعلقہ ویڈیوز تجویز کرے گا بلکہ ویڈیو کا خلاصہ، اہم نکات اور مطلوبہ جواب والا مخصوص حصہ بھی فوراً دکھا دے گا۔
غیر ملکی خبر رساں ایجنسی کے مطابق یہ فیچر مصنوعی ذہانت (AI) کی مدد سے کام کرے گا اور کسی چیٹ بوٹ کی طرح صارف کے سوالات سمجھے گا۔ مثال کے طور پر اگر کوئی صارف پوچھے کہ “فون کی بیٹری جلد ختم ہونے کی وجہ کیا ہے؟” تو یوٹیوب فوری طور پر متعلقہ ویڈیوز کے مخصوص کلپس سامنے لے آئے گا جہاں اس سوال کا جواب موجود ہوگا۔
اس فیچر کی سب سے دلچسپ بات یہ ہے کہ اب لمبی ویڈیوز کو مکمل دیکھنے کی ضرورت کم ہو جائے گی۔ AI صارف کو براہِ راست ویڈیو کے اُس حصے تک لے جائے گا جہاں مطلوبہ معلومات دی گئی ہوں۔ اس کے ساتھ ساتھ صارف اضافی یا فالو اپ سوالات بھی پوچھ سکے گا، بالکل ایسے جیسے کسی AI اسسٹنٹ سے گفتگو کی جا رہی ہو۔
گوگل کے سی ای او سندر پچائی نے سالانہ ڈیولپر کانفرنس میں اس فیچر کا اعلان کرتے ہوئے کہا کہ “Ask YouTube” معلومات حاصل کرنے کے عمل کو زیادہ تیز، آسان اور اسمارٹ بنا دے گا۔ ان کے مطابق مستقبل میں یوٹیوب صرف ویڈیو پلیٹ فارم نہیں بلکہ ایک “AI نالج ہب” بن جائے گا۔
ٹیکنالوجی ماہرین کا کہنا ہے کہ یہ اپ ڈیٹ یوٹیوب سرچ کے روایتی طریقہ کار کو بدل سکتی ہے۔ پہلے صارفین کو معلومات تلاش کرنے کے لیے مختلف ویڈیوز کھول کر وقت ضائع کرنا پڑتا تھا، مگر اب AI سیکنڈز میں درست حصہ سامنے لے آئے گا۔
ابتدائی مرحلے میں یہ فیچر صرف امریکا میں موجود 18 سال یا اس سے زائد عمر کے YouTube Premium صارفین کے لیے متعارف کرایا گیا ہے۔ تاہم گوگل نے اشارہ دیا ہے کہ جلد اسے دیگر ممالک تک بھی توسیع دی جائے گی۔
