پروونشل ڈیزاسٹر مینجمنٹ اتھارٹی (پی ڈی ایم اے) بلوچستان نے 4 جون سے صوبے کے مختلف علاقوں میں تیز ہواؤں، آندھی، گرج چمک کے ساتھ بارشوں اور بعض مقامات پر ژالہ باری کی پیشگوئی کے بعد ہائی الرٹ جاری کر دیا ہے۔
پی ڈی ایم اے کے مطابق کوئٹہ سمیت شمالی اور وسطی بلوچستان کے متعدد اضلاع میں موسم شدید رہنے کا امکان ہے، جبکہ ژوب، لورالائی، زیارت، ہرنائی اور قلعہ سیف اللہ میں گرج چمک کے ساتھ بارش اور بعض علاقوں میں ژالہ باری متوقع ہے۔
خضدار، آواران، مسلم باغ اور قلعہ عبداللہ میں تیز گرد آلود ہواؤں اور ہلکی بارش کا امکان ظاہر کیا گیا ہے۔
اتھارٹی نے تمام ڈپٹی کمشنرز اور متعلقہ اداروں کو ہدایت کی ہے کہ کسی بھی ہنگامی صورتحال سے نمٹنے کے لیے پیشگی اقدامات کیے جائیں اور ریسکیو ادارے الرٹ رہیں۔
پی ڈی ایم اے نے شہریوں کو خبردار کیا ہے کہ تیز ہواؤں اور ژالہ باری کے دوران کچے مکانات، کمزور ڈھانچوں اور سائن بورڈز کو نقصان پہنچ سکتا ہے، اس لیے احتیاط برتی جائے۔
عوام سے اپیل کی گئی ہے کہ شدید بارش اور آندھی کے دوران محفوظ مقامات پر رہیں، جبکہ کسانوں کو ہدایت دی گئی ہے کہ وہ فصلوں کی کٹائی اور دیگر زرعی سرگرمیاں موسمی صورتحال کو مدنظر رکھ کر کریں۔
ڈی جی پی ڈی ایم اے کے مطابق تمام ضلعی انتظامیہ اور ریسکیو ادارے مکمل طور پر الرٹ ہیں اور کسی بھی ہنگامی صورتحال سے نمٹنے کے لیے مشینری اور عملے کی موجودگی یقینی بنائی جا رہی ہے۔
