معروف ٹیکنالوجی کمپنی ڈیل نے کمپیوٹر مارکیٹ میں ایپل کو براہِ راست چیلنج دیتے ہوئے اپنا نیا اور نسبتاً سستا لیپ ٹاپ ”ایکس پی ایس 13“ متعارف کرا دیا ہے۔
کمپنی کے مطابق اس نئے ماڈل کا بنیادی ہدف طلبہ اور نوجوان پیشہ ور افراد ہیں، تاکہ وہ کم قیمت میں جدید اور ہلکی پھلکی ٹیکنالوجی تک رسائی حاصل کر سکیں۔
نئے لیپ ٹاپ کی ابتدائی قیمت 699 امریکی ڈالر مقرر کی گئی ہے، جو پاکستانی کرنسی میں تقریباً ایک لاکھ 95 ہزار روپے بنتی ہے۔ تاہم تعلیمی سیزن کے دوران 16 سال یا اس سے زائد عمر کے طلبہ کے لیے یہ قیمت کم کر کے 599 ڈالر (تقریباً ایک لاکھ 67 ہزار روپے) کر دی جائے گی۔
کمپنی حکام کے مطابق یہ ماڈل ڈیل کی تاریخ کا سب سے پتلا اور ہلکا لیپ ٹاپ ہے، جو وزن میں ایپل کے میک بک سے تقریباً آدھا پاؤنڈ کم ہے جبکہ اس کی اسکرین کا سائز نسبتاً بڑا ہے۔
مارکیٹ تجزیہ کاروں کے مطابق ڈیل کا یہ اقدام ایسے وقت میں سامنے آیا ہے جب عالمی سطح پر میموری چپس کی قلت اور قیمتوں میں اتار چڑھاؤ کے باعث ٹیکنالوجی کمپنیاں سخت مقابلے کی صورتحال سے دوچار ہیں۔
دوسری جانب ایپل نے رواں سال مارچ میں اپنے نئے میک بک ماڈلز متعارف کروائے تھے، جن کی ابتدائی قیمت 599 ڈالر رکھی گئی تھی، جبکہ طلبہ کے لیے یہ مزید کم قیمت پر دستیاب تھے۔ اس حکمتِ عملی کے باعث ایپل کی فروخت میں نمایاں اضافہ دیکھا گیا تھا۔
ڈیل کے چیف آپریٹنگ آفیسر جیف کلارک نے مقابلے پر ردعمل دیتے ہوئے کہا کہ وہ ایپل کی پالیسی کو مثبت سمجھتے ہیں کیونکہ اس سے واضح ہوتا ہے کہ مارکیٹ میں سستے اور معیاری لیپ ٹاپ کی مانگ موجود ہے۔
انہوں نے کہا کہ ڈیل طلبہ اور عام صارفین کے لیے بہتر اور قابلِ استطاعت متبادل فراہم کرنے کی کوشش کر رہی ہے۔
رپورٹس کے مطابق ڈیل نے اس سے قبل جنوری میں کنزیومر الیکٹرانکس شو (CES) لاس ویگاس میں اشارہ دیا تھا کہ وہ ہر قیمت کی کیٹیگری میں ایپل اور دیگر کمپنیوں کے ساتھ مقابلے کے لیے تیار ہے۔
اب کمپنی نے اپنی مشہور ایکس پی ایس سیریز کو نئے انداز میں پیش کرتے ہوئے اس منصوبے کو عملی شکل دے دی ہے۔ توقع ظاہر کی جا رہی ہے کہ اس اقدام سے کمپیوٹر مارکیٹ میں فروخت کے ممکنہ اتار چڑھاؤ کے اثرات کو کم کرنے میں مدد ملے گی۔
نیا ایکس پی ایس 13 لیپ ٹاپ انٹیل کور سیریز 3 پروسیسر کے ساتھ جلد مارکیٹ میں دستیاب ہوگا، جبکہ اس کا مزید طاقتور ورژن انٹیل کور الٹرا سیریز 3 کے ساتھ موسمِ گرما کے آخر میں متعارف کرائے جانے کا امکان ہے۔
