موبائل فون کی بیٹری سے متعلق مختلف غلط فہمیاں عام ہیں، جن میں ایک یہ بھی شامل ہے کہ چارجنگ کے دوران فون استعمال کرنے سے بیٹری خراب ہو جاتی ہے۔ تاہم ماہرین کے مطابق یہ تصور مکمل طور پر درست نہیں۔
اسمارٹ فون کی بیٹری لائف مختلف عوامل سے متاثر ہوتی ہے جن میں حرارت، بیٹری کی عمر اور چارجنگ کی عادات شامل ہیں۔ اگرچہ چارجنگ کے دوران فون استعمال کرنے سے چارجنگ کی رفتار سست ہو سکتی ہے، لیکن عام حالات میں اس سے بیٹری کو براہِ راست نقصان نہیں پہنچتا۔
ماہرین کا کہنا ہے کہ جب فون چارج ہو رہا ہو اور ساتھ استعمال بھی کیا جا رہا ہو تو ڈیوائس ایک ہی وقت میں توانائی حاصل اور استعمال کر رہی ہوتی ہے، جس کی وجہ سے چارجنگ کا عمل نسبتاً سست ہو جاتا ہے۔
ان کے مطابق اگر فون غیر معمولی حد تک گرم نہ ہو تو چارجنگ کے دوران استعمال سے بیٹری کی صحت یا عمر پر نمایاں منفی اثرات مرتب نہیں ہوتے۔
چارجنگ کے دوران ہلکے نوعیت کے کام جیسے ای میلز چیک کرنا، پیغامات پڑھنا، موسیقی سننا، نوٹس بنانا، سوشل میڈیا استعمال کرنا یا انٹرنیٹ براؤز کرنا محفوظ سمجھا جاتا ہے۔
البتہ ماہرین خبردار کرتے ہیں کہ بھاری نوعیت کے کام، جیسے موبائل گیمز کھیلنا، 4K ویڈیوز اسٹریم کرنا یا ہائی ریزولوشن ویڈیو ریکارڈ کرنا، فون کو زیادہ گرم کر سکتے ہیں۔
زیادہ حرارت بیٹری کے لیے سب سے بڑا خطرہ سمجھی جاتی ہے کیونکہ اس سے بیٹری کی کارکردگی متاثر ہوتی ہے، گنجائش کم ہو سکتی ہے اور طویل مدت میں اندرونی ساخت کو نقصان پہنچ سکتا ہے۔
ماہرین مشورہ دیتے ہیں کہ چارجنگ کے دوران فون کا استعمال کیا جا سکتا ہے، تاہم بہتر بیٹری لائف کے لیے ایسے کاموں سے گریز کیا جائے جو ڈیوائس کو غیر ضروری طور پر گرم کرتے ہوں۔
