دنیا بھر میں جہاں توجہ برقی گاڑیوں اور متبادل توانائی کے ذرائع پر مرکوز ہے، وہیں امریکی ریاست یوٹاہ کی بریگھم ینگ یونیورسٹی کے طلبہ نے ایک ایسی حیران کن تجرباتی گاڑی تیار کی ہے جس نے ایندھن کی بچت کے تمام تصورات کو نئی جہت دے دی ہے۔
"سپر مائلیج" نامی یہ خصوصی گاڑی صرف ایک گیلن (تقریباً 3.8 لیٹر) ایندھن پر 2,145 میل (3,450 کلومیٹر سے زائد) سفر کرنے کی صلاحیت رکھتی ہے۔ اس غیر معمولی کار کو سالانہ شیل ایکو میراتھون مقابلے کے لیے ڈیزائن کیا گیا ہے، جہاں مقصد کم سے کم ایندھن استعمال کرتے ہوئے زیادہ سے زیادہ فاصلہ طے کرنا ہوتا ہے۔
انتہائی ہلکی اور ایروڈائنامک ساخت رکھنے والی اس گاڑی کا وزن صرف 49 کلوگرام ہے۔ کاربن فائبر سے تیار کردہ اس گاڑی میں ایک نہایت چھوٹا ایندھن ٹینک نصب ہے، جس کی گنجائش صرف 30 ملی لیٹر ہے۔
گاڑی کے ڈیزائن میں ایندھن کی بچت کو اولین ترجیح دی گئی ہے، جس کے باعث اس میں روایتی گاڑیوں کی بیشتر سہولیات شامل نہیں کی گئیں۔ یہاں تک کہ ڈرائیور کے قد اور وزن کے لیے بھی مخصوص حدود مقرر کی گئی ہیں تاکہ گاڑی کی کارکردگی زیادہ سے زیادہ بہتر بنائی جا سکے۔
ماہرین کے مطابق اگر صرف ایندھن کی اوسط کھپت کو دیکھا جائے تو یہ گاڑی نظریاتی طور پر یوٹاہ سے نیویارک تک کا سفر ایک گیلن ایندھن میں مکمل کر سکتی ہے۔ تاہم عملی طور پر یہ سفر آسان نہیں ہوگا کیونکہ گاڑی کی رفتار محدود ہے اور اسے بار بار ایندھن بھرنے کی ضرورت پڑتی ہے۔
انجینئرنگ کے طلبہ کا کہنا ہے کہ اس منصوبے کا مقصد تجارتی گاڑی تیار کرنا نہیں بلکہ یہ ثابت کرنا ہے کہ جدید ڈیزائن، کم وزن اور بہتر ایروڈائنامکس کے ذریعے روایتی ایندھن سے چلنے والی گاڑیوں کی کارکردگی میں بھی حیران کن حد تک اضافہ کیا جا سکتا ہے۔
یہ منصوبہ مستقبل کی توانائی بچانے والی ٹرانسپورٹ ٹیکنالوجی کے لیے نئی راہیں کھول سکتا ہے اور انجینئرنگ کے شعبے میں نوجوانوں کی تخلیقی صلاحیتوں کی ایک نمایاں مثال بن کر سامنے آیا ہے۔
