انڈین پریمیئر لیگ (آئی پی ایل) 2026 میں راجستھان رائلز کے 15 سالہ نوجوان بیٹر ویبھو سوریاونشی نے اپنی شاندار کارکردگی سے کرکٹ شائقین کی توجہ حاصل کرتے ہوئے سیزن کے نمایاں ترین کھلاڑیوں میں جگہ بنا لی۔
بھارتی میڈیا رپورٹس کے مطابق ویبھو سوریاونشی نے پورے سیزن میں 776 رنز اسکور کیے اور سب سے زیادہ رنز بنانے والے بیٹر کے طور پر اورنج کیپ اپنے نام کی۔ اس کارکردگی کے ساتھ وہ آئی پی ایل 2026 کے ٹاپ اسکورر بھی قرار پائے۔
نوجوان بیٹر کو راجستھان رائلز نے گزشتہ سیزن سے قبل ہونے والی نیلامی میں 1.10 کروڑ بھارتی روپے میں اسکواڈ کا حصہ بنایا تھا، جبکہ رواں سیزن میں بھی ان کی ریٹینر رقم برقرار رکھی گئی۔
اگرچہ راجستھان رائلز پلے آف مرحلے سے آگے بڑھ کر فائنل تک رسائی حاصل نہ کر سکی، تاہم سوریاونشی نے سیزن بھر کی غیرمعمولی کارکردگی کے باعث انفرادی اعزازات اپنے نام کیے۔ فائنل میچ، جو نریندر مودی اسٹیڈیم میں کھیلا گیا، کے بعد ہونے والی تقریبِ تقسیمِ انعامات میں انہیں سیزن کا موسٹ ویلیو ایبل پلیئر قرار دیا گیا۔
رپورٹس کے مطابق موسٹ ویلیو ایبل پلیئر ایوارڈ کے ساتھ انہیں 15 لاکھ بھارتی روپے دیے گئے، جبکہ اورنج کیپ جیتنے پر 10 لاکھ روپے کا انعام ملا۔ اس کے علاوہ سپر اسٹرائیکر آف دی سیزن کے اعزاز کے ساتھ 10 لاکھ روپے اور ایک گاڑی بھی انعام میں دی گئی۔
ویبھو سوریاونشی نے سیزن میں 72 چھکے لگا کر سپر سکسز آف دی سیزن کا اعزاز بھی حاصل کیا، جس پر انہیں مزید 10 لاکھ روپے دیے گئے۔ انہیں ایمرجنگ پلیئر آف دی سیزن کا ایوارڈ بھی ملا، جس کے ساتھ 10 لاکھ روپے کی نقد رقم شامل تھی۔
رپورٹس کے مطابق نوجوان بیٹر نے سیزن میں 16 میچز کھیلے اور ہر میچ کے لیے 7.5 لاکھ بھارتی روپے میچ فیس حاصل کی۔ اس طرح صرف میچ فیس کی مد میں ان کی آمدن تقریباً 1.20 کروڑ بھارتی روپے رہی۔
مزید برآں، مختلف میچوں میں بہترین کارکردگی پر ملنے والے خصوصی انعامات، جن میں الیکٹرک اسٹرائیکر آف دی میچ اور موسٹ سکسز آف دی میچ جیسے اعزازات شامل ہیں، نے بھی ان کی مجموعی آمدن میں اضافہ کیا۔
میڈیا رپورٹس کے مطابق آئی پی ایل 2026 کے اختتام تک ویبھو سوریاونشی کی مجموعی آمدن 2.50 کروڑ بھارتی روپے سے تجاوز کر گئی، جو ان کی عمر اور ابتدائی کیریئر کے تناظر میں ایک نمایاں کامیابی سمجھی جا رہی ہے۔
