میامی: ارجنٹینا کے عالمی شہرت یافتہ فٹبالر لیونل میسی کی انجری سے متعلق خدشات نے مداحوں میں تشویش کی لہر دوڑا دی ہے۔
تفصیلات کے مطابق امریکی فٹبال لیگ (MLS) کے ایک اہم میچ میں انٹر میامی کی نمائندگی کرتے ہوئے لیونل میسی کو کھیل کے دوران تکلیف محسوس ہوئی، جس کے بعد انہوں نے خود متبادل کھلاڑی کے ساتھ تبدیل ہونے کی درخواست کی اور میدان چھوڑ دیا۔
یہ واقعہ فلاڈلفیا یونین کے خلاف کھیلے گئے میچ میں پیش آیا، جہاں بارش کے باعث گیلا میدان کھلاڑیوں کے لیے مزید مشکل ثابت ہو رہا تھا اور کھیل کی رفتار متاثر ہوئی۔
میچ کے 73ویں منٹ میں میسی کو اپنی بائیں ٹانگ کے پچھلے حصے (ہیمسٹرنگ ایریا) کو پکڑتے ہوئے دیکھا گیا، جس کے فوراً بعد ٹیم مینجمنٹ نے انہیں میدان سے باہر بلا لیا۔
اگرچہ ابتدائی مناظر نے مداحوں کو پریشان کیا، تاہم وہ ڈگ آؤٹ کی جانب معمول کے انداز میں چلتے ہوئے دکھائی دیے، جس سے انجری کی شدت کے بارے میں حتمی صورتحال واضح نہیں ہو سکی۔
