سیئٹل: فیفا ورلڈ کپ 2026 کے گروپ جی کے سنسنی خیز مقابلے میں مصر پہلی مرتبہ ورلڈ کپ میں فتح حاصل کرنے کے انتہائی قریب پہنچ گیا تھا، تاہم ایک بدقسمت سیلف گول نے اس کی جیت کی امیدوں پر پانی پھیر دیا اور میچ 1-1 سے برابر ختم ہوا۔
میچ کے آغاز سے ہی مصری ٹیم نے جارحانہ انداز اپنایا اور بیلجیئم کے دفاع پر مسلسل دباؤ برقرار رکھا۔ مصر کو 21ویں منٹ میں برتری اس وقت ملی جب مڈفیلڈر ایمان عاشور نے تقریباً 20 گز دور سے زبردست شاٹ کھیل کر گیند جال میں پہنچا دی۔ بیلجیئم کے تجربہ کار گول کیپر تھیباؤٹ کورٹوئس اس شاٹ کو روکنے میں ناکام رہے۔
برتری حاصل کرنے کے بعد بھی مصر نے حملے جاری رکھے اور پہلے ہاف میں کئی مواقع پیدا کیے، تاہم کورٹوئس نے عمدہ گول کیپنگ کا مظاہرہ کرتے ہوئے مزید گول ہونے سے بچا لیا۔
دوسرے ہاف میں مصری کپتان محمد صلاح بھی گول کرنے کے قریب پہنچے، لیکن ان کا خطرناک ہیڈر بیلجیئم کے گول کیپر نے شاندار انداز میں روک لیا۔
میچ کا اہم موڑ 66ویں منٹ میں آیا جب بیلجیئم کے کوچ روڈی گارشیا نے اسٹار اسٹرائیکر رومیلو لوکاکو کو میدان میں اتارا۔ لوکاکو کی آمد کے چند لمحوں بعد تھامس میونیئر کی جانب سے دی گئی گیند کو مصری مدافع محمد ہانی دباؤ میں آکر اپنے ہی جال میں پہنچا بیٹھے، جس کے نتیجے میں بیلجیئم کو برابری کا گول مل گیا۔
اس سے قبل بیلجیئم کے مایہ ناز مڈفیلڈر کیون ڈی بروئنے کی ایک خطرناک فری کک پوسٹ سے ٹکرا گئی تھی، جس سے یورپی ٹیم کے مسلسل دباؤ کا اندازہ لگایا جا سکتا تھا۔
سیئٹل میں موجود مصری شائقین نے اپنی ٹیم کی بھرپور حوصلہ افزائی کی، تاہم سات مرتبہ کی افریقی چیمپئن ٹیم ایک بار پھر ورلڈ کپ کی تاریخ میں اپنی پہلی فتح حاصل کرنے میں ناکام رہی۔
1934 میں پہلی مرتبہ ورلڈ کپ میں شرکت کرنے والی مصر کی ٹیم اب تک اپنے آٹھ ورلڈ کپ میچز میں کامیابی حاصل نہیں کر سکی، تاہم بیلجیئم جیسے مضبوط حریف کے خلاف ایک پوائنٹ حاصل کرنا اس کے لیے حوصلہ افزا نتیجہ قرار دیا جا رہا ہے۔
