سعودی عرب کے جنرل اتھارٹی برائے شماریات نے رواں سال حج کے باضابطہ اعداد و شمار جاری کر دیے ہیں، جن کے مطابق مجموعی طور پر 17 لاکھ 7 ہزار 301 عازمین نے فریضہ حج ادا کیا۔
سرکاری رپورٹ کے مطابق دنیا کے 165 ممالک سے تعلق رکھنے والے 15 لاکھ 46 ہزار 655 غیر ملکی حجاج نے حج میں شرکت کی، جن میں سعودی عرب میں مقیم غیر ملکی افراد بھی شامل تھے۔
اعداد و شمار کے مطابق اس سال 1 لاکھ 60 ہزار 646 سعودی شہریوں اور مقامی رہائشیوں نے بھی مناسک حج ادا کیے۔
رپورٹ میں بتایا گیا کہ مجموعی حجاج میں 8 لاکھ 93 ہزار 396 مرد جبکہ 8 لاکھ 13 ہزار 905 خواتین شامل تھیں۔
سعودی محکمہ شماریات کے مطابق زیادہ تر غیر ملکی حجاج فضائی سفر کے ذریعے مملکت پہنچے۔ مجموعی طور پر 14 لاکھ 85 ہزار 729 افراد نے ہوائی راستہ اختیار کیا، جبکہ 54 ہزار 429 عازمین زمینی راستے سے سعودی عرب پہنچے۔ اس کے علاوہ 6 ہزار 497 حجاج نے سمندری راستے سے سفر کیا۔
سرکاری اعداد و شمار کے مطابق گزشتہ سال مجموعی طور پر 16 لاکھ 73 ہزار 230 افراد نے حج ادا کیا تھا، جس کے مقابلے میں رواں برس حجاج کی تعداد میں اضافہ ریکارڈ کیا گیا ہے۔
سعودی حکام کا کہنا ہے کہ حج آپریشن کے دوران جدید ٹیکنالوجی، سکیورٹی انتظامات، ٹرانسپورٹ اور طبی سہولیات کو مزید بہتر بنایا گیا تاکہ لاکھوں عازمین کو سہولت فراہم کی جا سکے۔
