مکہ مکرمہ: حج کے مقدس مناسک کی ادائیگی کے لیے دنیا بھر سے آئے لاکھوں عازمین کے درمیان ایک ایسی متاثر کن کہانی بھی سامنے آئی ہے جو ایمان کے سفر کی خوبصورت مثال بن گئی ہے۔
اٹلی سے تعلق رکھنے والے نومسلم محمد لوقا اس وقت منیٰ میں دیگر حجاج کے ساتھ حج کے مناسک ادا کر رہے ہیں۔ ان کا روحانی سفر ایک ایسی آواز سے شروع ہوا جس نے ان کی زندگی کا رخ ہمیشہ کے لیے بدل دیا۔
محمد لوقا کے مطابق، انہوں نے 12 سال کی عمر میں پہلی بار ٹی وی پر اذان سنی تھی، جس کی دل کو چھو لینے والی آواز نے ان کے اندر اسلام کے بارے میں تجسس اور گہری دلچسپی پیدا کی۔
اس ابتدائی اثر کے بعد انہوں نے اسلام کے بارے میں سنجیدہ مطالعہ شروع کیا اور کئی سال تک مختلف مذاہب کا تقابلی جائزہ لیتے رہے، یہاں تک کہ تحقیق اور غور و فکر کے بعد انہوں نے اسلام قبول کرنے کا فیصلہ کیا۔
ان کا کہنا ہے کہ اسلام نے ان کی زندگی کو واضح مقصد، ذہنی سکون اور ایک نیا معنوی راستہ عطا کیا، جس سے وہ ماضی کی بے یقینی اور ذہنی الجھنوں سے نکل آئے۔
محمد لوقا نے حج کے دوران حرمین شریفین کے بہترین انتظامات اور سعودی عرب کی جانب سے عازمین حج کے لیے فراہم کی جانے والی سہولیات کو بھی سراہا۔
ان کے مطابق، حج کے روحانی ماحول، حرمین سے بلند ہونے والی اذانوں اور “لبیک اللھم لبیک” کی صداؤں نے ان کے دل میں ایک گہرا روحانی سکون اور عقیدت پیدا کر دی ہے۔
