احمد بودلہ نے عالمی ریکارڈز کی دنیا میں پاکستان کا نام روشن کر دیا

پاکستانی مارشل آرٹسٹ اور اینڈورینس ایتھلیٹ احمد بودلہ نے ایک اور تاریخی سنگِ میل عبور کرتے ہوئے دنیا بھر میں نیا ریکارڈ قائم کر دیا ہے۔

وہ پاکستان کی تاریخ کے پہلے کھلاڑی بن گئے ہیں جنہیں بیک وقت چار مختلف عالمی ریکارڈ کتابوں میں شامل کیا گیا ہے۔ ان کی غیر معمولی کارکردگی نے انہیں بین الاقوامی سطح پر منفرد مقام دلا دیا ہے۔

اب تک احمد بودلہکے نام 18 گنیز ورلڈ ریکارڈز درج ہیں، جبکہ وہ 30 سے زائد دیگر عالمی ریکارڈ ٹائٹلز بھی مختلف عالمی اداروں سے حاصل کر چکے ہیں۔

وہ جن چار عالمی ریکارڈ اداروں میں شامل کیے گئے ہیں ان میں گنیز ورلڈ ریکارڈز، ایشین بک آف ریکارڈز، جرمنی کی بک آف الٹرنیٹو ریکارڈز اور بھارت کی اسسٹ ورلڈ ریکارڈز شامل ہیں۔

مزید یہ کہ احمد بودلہ کو امریکا کی مارشل آرٹس ہال آف فیم میں شامل کیے جانے والے پہلے پاکستانی ہونے کا اعزاز بھی حاصل ہے، جو ان کے عالمی مقام کو مزید مضبوط کرتا ہے۔

رپورٹ کے مطابق وہ اس وقت چار مختلف گنیز کیٹیگریز میں عالمی نمبر ون پوزیشن پر بھی فائز ہیں۔

تعلیم کے میدان میں بھی وہ نمایاں رہے ہیں اور ایم فل میں گولڈ میڈل حاصل کر چکے ہیں جبکہ اس وقت پی ایچ ڈی اسکالر کے طور پر اپنی تعلیم جاری رکھے ہوئے ہیں۔

انہوں نے اپنے بیان میں کہا کہ وہ پاکستان کی نمائندگی کو اپنا مشن سمجھتے ہیں اور نوجوانوں کو محنت، نظم و ضبط اور لگن کے ذریعے کامیابی حاصل کرنے کی ترغیب دیتے رہیں گے۔