Forza Horizon 6 نے اسٹییم پر نیا ریکارڈ قائم کر دیا، 60 لاکھ سے زائد صارفین
مائیکروسافٹ اور پلے گراؤنڈ گیمز کی نئی ریسنگ گیم "فورزا ہورائزن 6" نے ریلیز کے صرف ایک ہفتے کے اندر 60 لاکھ سے زائد صارفین حاصل کر کے گیمنگ دنیا میں نیا ریکارڈ قائم کر دیا ہے۔
گیم کو ابتدائی طور پر 15 مئی کو خصوصی ایڈیشن رکھنے والے صارفین کے لیے قبل از وقت رسائی میں جاری کیا گیا، جبکہ مکمل ریلیز 19 مئی کو عام صارفین اور سبسکرپشن سروس کے اراکین کے لیے کی گئی۔
ریلیز کے بعد اس گیم نے اسٹییم پر بھی غیر معمولی مقبولیت حاصل کی، جہاں ایک وقت میں 2 لاکھ 84 ہزار سے زائد صارفین آن لائن موجود رہے، جو اس سیریز کے لیے اب تک کا سب سے بڑا ریکارڈ ہے۔
رپورٹس کے مطابق ابتدائی رسائی کے دوران بھی ایک لاکھ 70 ہزار سے زائد صارفین گیم کے ساتھ منسلک رہے، جبکہ بعد میں یہ تعداد مزید بڑھتی گئی۔
یہ کارکردگی پچھلی قسطوں کے مقابلے میں نمایاں طور پر بہتر ہے، جہاں "فورزا ہورائزن 5" تقریباً 80 ہزار اور "فورزا ہورائزن 4" تقریباً 75 ہزار صارفین تک محدود رہی تھیں۔
ایکس باکس حکام کے مطابق یہ سیریز کی تاریخ کا سب سے کامیاب ابتدائی لانچ ہے۔
ناقدین کی جانب سے بھی گیم کو بھرپور پذیرائی ملی ہے اور اس کا مجموعی اسکور 100 میں سے 91 رپورٹ کیا گیا ہے، جبکہ زیادہ تر جائزے مثبت قرار دیے گئے ہیں۔
اس گیم کی خاص بات اس کا نیا نقشہ ہے جو جاپان پر مبنی ہے، جہاں کھلاڑی کھلی دنیا میں مختلف گاڑیوں کے ساتھ ریسنگ کا لطف اٹھا سکتے ہیں۔
گیم ایکس باکس، کمپیوٹر اور اسٹییم پر دستیاب ہے، جبکہ اسے سبسکرپشن سروس کے ذریعے بھی کھیلا جا سکتا ہے۔ اس کی قیمت تقریباً 70 ڈالر مقرر کی گئی ہے۔
