برازیل اور مراکش کا سنسنی خیز مقابلہ 1-1 گول سے برابر
میکسیکو سٹی: فیفا ورلڈ کپ 2026 میں برازیل اور مراکش کے درمیان کھیلا گیا دلچسپ مقابلہ 1-1 گول سے برابر ختم ہوگیا، جہاں مراکش نے شاندار کارکردگی کا مظاہرہ کرتے ہوئے پانچ بار کی عالمی چیمپئن ٹیم کو سخت ٹکر دی۔
میچ کے 21ویں منٹ میں مراکش نے برتری حاصل کی جب اسماعیل سیاباری نے برازیلین گول کیپر ایلیسن بیکر کی غلطی کا فائدہ اٹھاتے ہوئے شاندار لوپڈ شاٹ کے ذریعے گیند جال میں پہنچا دی۔ یہ ورلڈ کپ کی تاریخ میں پہلا موقع تھا جب مراکش نے کسی جنوبی امریکی ٹیم کے خلاف گول اسکور کیا۔
مراکش نے ابتدائی آدھے گھنٹے تک کھیل پر مکمل گرفت برقرار رکھی اور برازیل پر مسلسل دباؤ ڈالے رکھا۔ تاہم برازیل نے 32ویں منٹ میں میچ میں واپسی کی جب اسٹار فارورڈ وینیسیئس جونیئر نے اپنی 50ویں بین الاقوامی میچ میں یادگار گول اسکور کیا۔
برونو گومیز کی عمدہ پاس پر وینیسیئس جونیئر نے دفاعی کھلاڑیوں کو چکمہ دیتے ہوئے طاقتور شاٹ لگایا اور گیند کو جال میں پہنچا دیا۔
پہلے ہاف کے اختتام سے قبل لوکاس پاکیٹا کو بھی گول کرنے کا موقع ملا لیکن مراکش کے گول کیپر نے شاندار بچاؤ کرتے ہوئے اپنی ٹیم کو نقصان سے بچا لیا۔
دوسرے ہاف میں دونوں ٹیموں نے محتاط انداز اپنایا اور کئی مواقع بننے کے باوجود کوئی بھی ٹیم فیصلہ کن گول کرنے میں کامیاب نہ ہو سکی۔ برازیل کے رافینہا کو بھی ایک سنہری موقع ملا لیکن وہ گیند تک بروقت نہ پہنچ سکے۔
اس ڈرا کے بعد برازیل نے ورلڈ کپ کے افتتاحی میچوں میں اپنی 92 سالہ ناقابلِ شکست روایت برقرار رکھی، جبکہ مراکش ایک بار پھر عمدہ کھیل کے باوجود مکمل تین پوائنٹس حاصل کرنے سے محروم رہا۔
