پاکستان نے افغانستان کو 0-2 سے شکست دے کر ڈائمنڈ جوبلی فٹبال ٹورنامنٹ جیت لیا
مالدیپ: پاکستان نے شاندار کارکردگی کا مظاہرہ کرتے ہوئے افغانستان کو 0-2 سے شکست دے کر 4 ملکی ڈائمنڈ جوبلی فٹبال ٹورنامنٹ کا ٹائٹل اپنے نام کر لیا۔
پاکستانی ٹیم کے کھلاڑی اور آفیشلز ٹورنامنٹ جیتنے کے بعد ٹرافی اٹھا کر جشن منارہے ہیں۔ - فوٹو: سوشل میڈیا
فائنل میچ میں پاکستان نے آغاز سے ہی جارحانہ کھیل پیش کیا اور حریف ٹیم پر دباؤ برقرار رکھا۔ قومی ٹیم کی جانب سے پہلا گول شائق دوست نے اسکور کیا، جس کے ذریعے پاکستان کو برتری حاصل ہوئی۔
میچ کے آخری لمحات میں پاکستان نے اپنی برتری کو مزید مضبوط کرتے ہوئے دوسرا گول اسکور کیا، جو ہارون حامد نے شاندار انداز میں کیا اور میچ کا نتیجہ پاکستان کے حق میں 0-2 کر دیا۔
اس ٹورنامنٹ کی خاص بات یہ بھی رہی کہ پورے ایونٹ میں کسی بھی ٹیم نے پاکستان کے خلاف کوئی گول اسکور نہیں کیا، جو ٹیم کی مضبوط دفاعی حکمت عملی کا واضح ثبوت ہے۔
پاکستان کے شائق دوست کو فائنل کا بہترین کھلاڑی قرار دیا گیا۔ - فوٹو: اسکرین گریب
یہ کامیابی پاکستان فٹبال ٹیم کے لیے ایک تاریخی سنگ میل ہے کیونکہ یہ قومی ٹیم کا پہلا باضابطہ بین الاقوامی فٹبال ٹورنامنٹ ٹائٹل ہے۔
یاد رہے کہ 1952 میں پاکستان فٹبال ٹیم سیلون کپ میں بھارت کے ساتھ مشترکہ فاتح رہی تھی، جبکہ 1991 میں سیف گیمز میں قومی ٹیم نے گولڈ میڈل جیتا تھا۔
یہ فتح پاکستان فٹبال کے لیے ایک نئے دور کی شروعات اور کھلاڑیوں کے لیے حوصلہ افزائی کا ذریعہ قرار دی جا رہی ہے۔
