چائے دنیا بھر میں سب سے زیادہ پسند کیے جانے والے گرم مشروبات میں شمار ہوتی ہے اور اسے پینے سے صحت کو مختلف فوائد حاصل ہوتے ہیں۔
ماہرین کے مطابق چائے میں کیفین، فلورائیڈ اور فلیونولز جیسے اہم اجزا موجود ہوتے ہیں جو جسمانی اور ذہنی صحت پر مثبت اثرات مرتب کرتے ہیں۔
متعدد تحقیقی رپورٹس میں یہ بات سامنے آئی ہے کہ مناسب مقدار میں چائے پینے سے امراض قلب، ذیابیطس اور دیگر بیماریوں کا خطرہ کم ہو سکتا ہے۔
تاہم اکثر افراد یہ سوال کرتے ہیں کہ روزانہ کتنے کپ چائے پینا صحت کے لیے محفوظ سمجھا جاتا ہے۔
طبی ماہرین کے مطابق ایک کپ چائے میں اوسطاً 40 ملی گرام کیفین موجود ہوتی ہے، جو جسم کو متحرک رکھنے اور ذہنی چوکنا پن بڑھانے میں مدد دیتی ہے۔
لیکن کیفین کی زیادہ مقدار دل کی دھڑکن تیز کرنے، بلڈ پریشر بڑھانے اور جسمانی تھکاوٹ کا باعث بھی بن سکتی ہے۔
تحقیقی رپورٹس میں یہ بھی بتایا گیا ہے کہ زیادہ چائے پینے سے جسم کو غذا میں موجود آئرن جذب کرنے میں مشکلات پیش آ سکتی ہیں، جبکہ بعض ادویات کے اثرات بھی متاثر ہو سکتے ہیں۔
مختلف تحقیقات کے مطابق روزانہ 2 سے 4 کپ چائے پینا محفوظ تصور کیا جاتا ہے، جبکہ کچھ مطالعات میں 10 کپ تک چائے پینے کو بھی نقصان دہ قرار نہیں دیا گیا۔
تاہم طبی ماہرین کی اکثریت کا کہنا ہے کہ روزانہ 3 سے 5 کپ چائے زیادہ تر افراد کے لیے مناسب اور محفوظ مقدار سمجھی جاتی ہے، جبکہ اس سے زیادہ استعمال کچھ افراد میں منفی اثرات پیدا کر سکتا ہے۔
