جرمنی کے ایک نوجوان نے شہد کھانے کی غیر معمولی رفتار کا مظاہرہ کرتے ہوئے گنیز ورلڈ ریکارڈز میں اپنا نام درج کرا لیا۔
غیر ملکی میڈیا رپورٹس کے مطابق جرمنی سے تعلق رکھنے والے اینڈرے اورٹولف نے صرف ایک منٹ میں 1,273 گرام (تقریباً سوا کلو) شہد کھا کر نیا عالمی ریکارڈ قائم کیا۔
شہد دنیا بھر میں صحت بخش اور مقبول غذاؤں میں شمار کیا جاتا ہے، تاہم اس کی گاڑھی ساخت کی وجہ سے اسے بڑی مقدار میں تیزی سے کھانا انتہائی مشکل سمجھا جاتا ہے۔ یہی وجہ ہے کہ اینڈرے کا یہ کارنامہ سوشل میڈیا پر خاصی توجہ حاصل کر رہا ہے۔
گنیز ورلڈ ریکارڈ کے مطابق اینڈرے نے 60 سیکنڈز کے مقررہ وقت میں شہد سے بھرے کنٹینر کو حیران کن رفتار سے خالی کر دیا۔ اس دوران انہوں نے ایک بڑے چمچ کی مدد سے مسلسل شہد کھایا اور مقررہ وقت ختم ہونے سے پہلے مطلوبہ مقدار مکمل کر لی۔
اس ریکارڈ کی ویڈیو سوشل میڈیا پر وائرل ہو چکی ہے، جہاں صارفین اینڈرے کی رفتار اور برداشت پر حیرت کا اظہار کر رہے ہیں۔
اینڈرے اورٹولف اس سے قبل بھی کئی منفرد اور عجیب و غریب عالمی ریکارڈز اپنے نام کر چکے ہیں اور انہیں گنیز ورلڈ ریکارڈز کی دنیا میں ایک معروف ریکارڈ ہولڈر سمجھا جاتا ہے۔
