زیمبیا کی سپر لیگ میں ایک فٹبالر کو شاندار کارکردگی پر ایسا انعام دیا گیا جس نے سوشل میڈیا صارفین کو حیران بھی کر دیا اور محظوظ بھی۔
مقامی میڈیا رپورٹس کے مطابق پاور ڈائناموس کلب کے کھلاڑی کینیڈی مسونڈا کو نکانا ایف سی کے خلاف میچ میں فیصلہ کن گول اسکور کرنے پر ’مین آف دی میچ‘ قرار دیا گیا۔
مسونڈا کے واحد گول کی بدولت پاور ڈائناموس نے مقابلہ 0-1 سے اپنے نام کیا، جس کے بعد انہیں بہترین کھلاڑی کا اعزاز دیا گیا۔
تاہم تقریبِ انعامات کے دوران سب کی توجہ اس وقت انعام پر مرکوز ہو گئی جب انہیں روایتی ٹرافی، شیلڈ یا نقد رقم کے بجائے انڈوں کے 5 کریٹ پیش کیے گئے۔
یہ غیر معمولی انعام سوشل میڈیا پر تیزی سے وائرل ہو گیا، جہاں صارفین نے اس پر دلچسپ تبصرے کیے۔ بعض افراد نے اسے مہنگائی کے دور میں ایک "عملی اور مفید انعام" قرار دیا، جبکہ کچھ نے اسے فٹبال کی دنیا کے منفرد ترین انعامات میں شامل کر لیا۔
افریقی ممالک میں مقامی کاروباری ادارے اکثر کھیلوں کی ٹیموں اور مقابلوں کی اسپانسرشپ کرتے ہیں، جس کے باعث بعض اوقات کھلاڑیوں کو نقد رقم کے بجائے روزمرہ استعمال کی اشیاء بھی بطور انعام دی جاتی ہیں۔
کینیڈی مسونڈا کی تصویر، جس میں وہ انڈوں کے کریٹس کے ساتھ کھڑے ہیں، کھیلوں کی دنیا کی دلچسپ خبروں میں شامل ہو چکی ہے اور دنیا بھر کے فٹبال شائقین کی توجہ حاصل کر رہی ہے۔
