ماسکو: روس میں ایک 18 سالہ طالب علم کو ایڈولف ہٹلر کے نام سے پیزا آرڈر کرنے اور آن لائن ممنوعہ نازی علامات شیئر کرنے کے الزام میں پانچ روز قید کی سزا سنا دی گئی۔
بین الاقوامی میڈیا رپورٹس کے مطابق نوجوان نے ایک شاپنگ سینٹر کے ریسٹورنٹ سے پیزا آرڈر کرتے وقت اپنا نام "ایڈولف ہٹلر" بتایا، جس پر حکام نے اس کے خلاف کارروائی کرتے ہوئے اسے نازی علامتوں کی تشہیر سے متعلق قوانین کے تحت حراست میں لے لیا۔
رپورٹس کے مطابق طالب علم کو اس کے کالج کے احاطے سے گرفتار کیا گیا۔ گرفتاری کے دوران اس نے کسی قسم کی مزاحمت نہیں کی اور اپنے عمل پر معذرت کا اظہار کیا۔
تحقیقات کے دوران پولیس کو معلوم ہوا کہ طالب علم نے اپنی ڈیسک پر بھی بعض ممنوعہ نازی علامات بنائی تھیں اور ان کی تصاویر ایک آن لائن چیٹ گروپ میں شیئر کی تھیں۔
روسی حکام کے مطابق اس واقعے کی اطلاع ایک مقامی سیاسی شخصیت نے قانون نافذ کرنے والے اداروں کو دی، جس کے بعد تحقیقات کا آغاز کیا گیا۔
پولیس کے مطابق نوجوان نے دورانِ تفتیش اپنے عمل کا اعتراف کرتے ہوئے کہا کہ اسے اپنے اقدامات کی سنگینی اور قانونی نتائج کا مکمل ادراک نہیں تھا اور وہ آئندہ ایسی حرکت دوبارہ نہیں کرے گا۔
روس میں نازی نظریات، علامتوں اور ان کی تشہیر کے خلاف سخت قوانین نافذ ہیں، جن کے تحت ایسے اقدامات پر جرمانے، قید یا دیگر قانونی سزائیں دی جا سکتی ہیں۔
