بھارتی ریاست اتر پردیش کے ضلع بلند شہر میں ایک غیر معمولی واقعہ اس وقت پیش آیا جب ایک بندر نے شہری کے ہاتھ سے 2 لاکھ روپے سے بھرا بیگ چھین لیا اور درخت پر چڑھ کر نوٹوں کی بارش شروع کر دی۔
رپورٹس کے مطابق یہ واقعہ ڈسٹرکٹ کورٹ کمپلیکس کے باہر پیش آیا، جہاں ایک شخص زمین کی خرید و فروخت کے سلسلے میں اپنے وکیل سے ملاقات کے لیے آیا تھا۔ اس کے پاس 500 روپے کے نوٹوں سے بھرا ایک بیگ موجود تھا۔
عینی شاہدین کے مطابق اچانک ایک بندر جھپٹا اور بیگ چھین کر قریبی درخت پر جا بیٹھا۔ ابتدا میں لوگوں نے سمجھا کہ بندر شاید بیگ میں موجود کوئی کھانے پینے کی چیز تلاش کر رہا ہے، تاہم جب اس نے بیگ کھولا تو اندر سے کرنسی نوٹ برآمد ہوئے۔
بندر نے نوٹوں کی گڈیاں کھول کر انہیں فضا میں اچھالنا شروع کر دیا، جس کے نتیجے میں درخت کے نیچے اور اطراف میں نوٹ بکھر گئے۔ دیکھتے ہی دیکھتے موقع پر موجود افراد کی بڑی تعداد جمع ہوگئی اور لوگ اڑتے ہوئے نوٹ سمیٹنے کی کوشش کرنے لگے۔
واقعے کی ویڈیو سوشل میڈیا پر تیزی سے وائرل ہو رہی ہے، جہاں صارفین اس دلچسپ منظر پر حیرت اور مزاحیہ تبصرے کر رہے ہیں۔
مقامی میڈیا کے مطابق بعد ازاں بیشتر رقم واپس حاصل کر لی گئی، تاہم حکام کی جانب سے اس حوالے سے کوئی باضابطہ بیان جاری نہیں کیا گیا۔
