نیویارک کے میئر ظہران ممدانی کا دلچسپ فیصلہ: این بی اے فائنل کے لیے بچوں کے سونے کے اوقات معطل!
نیویارک سٹی کے میئر ظہران ممدانی نے پیر کے روز ایک انتہائی دلچسپ اور منفرد ایگزیکٹیو آرڈر پر دستخط کر کے سوشل میڈیا صارفین اور کھیلوں کے مداحوں کے دل جیت لیے ہیں۔
بچوں کی موجودگی میں ایگزیکٹیو آرڈر پر دستخط
میئر ظہران ممدانی نے فوٹو اینڈ ویڈیو شیئرنگ ایپ انسٹاگرام پر کچھ نئی ویڈیوز اور تصاویر شیئر کی ہیں جن میں انہیں اپنے آفس میں بچوں کے جھرمٹ میں اس خصوصی آرڈر پر دستخط کرتے دیکھا جا سکتا ہے۔ اس موقع کو مزید دلچسپ بنانے کے لیے، ویڈیوز میں بچے بھی خوشی خوشی کاغذ پر اپنے ہاتھ کے نشانات (Handprints) سے مہر لگا کر اس ایگزیکٹیو آرڈر کی توثیق کرتے نظر آ رہے ہیں۔
سونے کے اوقات عارضی معطلی
میئر نیویارک نے اپنی انسٹاگرام پوسٹ میں اس آرڈر کی تفصیلات بتاتے ہوئے کہا کہ آج میں نے اس ایگزیکٹیو آرڈر پر دستخط کر کے بچوں کے لیے مقرر کردہ 'سونے کے اوقات کے قوانین' کو عارضی طور پر معطل کر دیا ہے۔
اس معطلی کا واحد مقصد یہ ہے کہ نیویارک کے بچے بغیر کسی رکاوٹ، نیند کی پابندی یا ڈانٹ کے این بی اے (NBA) کے فائنل میں اپنی ہوم ٹیم نیویارک نِکس (New York Knicks) کو کھیلتا دیکھ سکیں۔
"یہ کوئی مشکل فیصلہ نہیں تھا"
ظہران ممدانی خود بھی نیو یارک نِکس کے بہت بڑے مداح ہیں اور اپنے پسندیدہ باسکٹ بال کلب کے 27 سال کے طویل عرصے بعد پہلی بار چیمپئن شپ کے فائنل میں پہنچنے پر بے حد خوش ہیں۔
انہوں نے اپنے جذبات کا اظہار کرتے ہوئے لکھا:
"بطور میئر آپ کو بہت سے مشکل فیصلے کرنے پر مجبور ہونا پڑتا ہے، لیکن یقین مانیں یہ فیصلہ بالکل بھی مشکل نہیں تھا۔"
اپنی پوسٹ کے آخر میں انہوں نے اپنے شہر کی باسکٹ بال ٹیم نیو یارک نکس کے لیے نیک خواہشات کا اظہار کیا اور امید ظاہر کی کہ ٹیم فائنل میں شاندار کارکردگی کا مظاہرہ کرے گی۔
