چاکلیٹ کے شوقین افراد کے لیے جاپان سے ایک دلچسپ خبر سامنے آئی ہے، جہاں دنیا کی سب سے باریک چاکلیٹ تیار کر لی گئی ہے۔ اس منفرد چاکلیٹ کی موٹائی محض 0.03 ملی میٹر ہے، جو انسانی بال سے بھی کئی گنا زیادہ باریک سمجھی جاتی ہے۔
جاپان کی معروف کنفیکشنری کمپنی میٹے (Mattee) کی تیار کردہ اس چاکلیٹ کو "کورٹیشیا" (Cortecia) کا نام دیا گیا ہے، جس کا اطالوی زبان میں مطلب "درخت کی چھال" ہے۔ چاکلیٹ کا منفرد ڈیزائن بھی درخت کی باریک چھال سے مشابہت رکھتا ہے، جس کی وجہ سے یہ دنیا بھر میں توجہ حاصل کر رہی ہے۔
یہ خصوصی چاکلیٹ پہلی مرتبہ 2024 میں ٹوکیو کے علاقے ازابودائی ہلز میں متعارف کرائی گئی تھی۔ کمپنی کے مطابق اس کی تیاری کے لیے ایک خصوصی مشین تیار کی گئی، جسے بنانے میں تقریباً ڈیڑھ سال کا عرصہ لگا۔ اس مشین کی مدد سے چاکلیٹ کو انتہائی باریک تہہ کی شکل دی جاتی ہے، جو روایتی چاکلیٹ کے مقابلے میں بالکل مختلف ساخت رکھتی ہے۔
کمپنی کے بانی میٹیئو سانکلیکا کا کہنا ہے کہ ان کا مقصد ایسی چاکلیٹ تیار کرنا تھا جو زبان کو چھوتے ہی فوراً گھل جائے اور صارف کو ایک منفرد ذائقے اور ساخت کا تجربہ فراہم کرے۔ یہی وجہ ہے کہ کورٹیشیا کی باریک تہہ منہ میں رکھتے ہی تقریباً فوری طور پر پگھل جاتی ہے۔
ماہرین کے مطابق چاکلیٹ کو اتنا باریک بنانا ایک بڑی تکنیکی کامیابی ہے کیونکہ عام چاکلیٹ اپنی ساخت برقرار رکھنے کے لیے ایک مخصوص موٹائی کی محتاج ہوتی ہے۔ کورٹیشیا اس تصور کو بدلتے ہوئے چاکلیٹ سازی کی دنیا میں ایک نئی جدت کے طور پر سامنے آئی ہے۔
غذائی ماہرین کا کہنا ہے کہ معیاری ڈارک چاکلیٹ میں موجود فلیوونائڈز اور دیگر قدرتی مرکبات دل کی صحت کے لیے مفید ہو سکتے ہیں، تاہم اس کے فوائد کا انحصار استعمال کی مقدار اور چاکلیٹ کے معیار پر ہوتا ہے۔
کورٹیشیا نہ صرف اپنی غیر معمولی باریکی بلکہ منفرد ذائقے اور دلکش ڈیزائن کی وجہ سے بھی دنیا بھر کے چاکلیٹ شائقین کی توجہ کا مرکز بن چکی ہے۔
